Verð hlutabréfa skotvopnaframleiðandans Smith & Wesson Brands Inc. tók sveiflu upp á við í gær í kjölfar dóms Hæstaréttar Bandaríkjanna í fyrradag, þar sem því var slegið föstu að hver maður nyti stjórnarskrárvarins réttar til að bera skotvopn á almannafæri til að verja hendur sínar.
Þurfi ekki að biðja um leyfi
Hækkuðu bréfin um 14,6 prósent í síðdegisviðskiptum í gær eftir 9,6 prósenta hækkun strax í kjölfar dómsins á fimmtudag. Skjótt skipast veður í lofti því við lokun markaða á miðvikudag enduðu bréfin í lægsta verði sínu síðan í júní 2020.Svipaða sögu er að segja af skotvopnaframleiðandanum Sturm, Ruger & Co sem hækkaði samtals um 7,5 prósent í gær og fyrradag eftir að hafa endað miðvikudaginn í lægsta verði síðustu 18 mánaða.
„Þessi dómur snýst í stuttu máli um að ábyrgir og löghlýðnir borgarar þurfa ekki að biðja stjórnvöld um leyfi til að nýta sér réttindi sem þeim eru tryggð í stjórnarskrá landsins,“ sagði Mark Smith, stjórnarformaður Smith & Wesson, á fundi eftir lokun markaða í gær og bætti því við að enn væri of snemmt að segja til um hver áhrif dómsins á afkomu skotvopnaframleiðenda yrðu til lengri tíma litið.