Popplistamaðurinn Claes Oldenburg, sem þekktastur er fyrir litríka stóra útiskúlptúra sína af hversdagslegum hlutum, er látinn 93 ára að aldri. Í frétt The Guardian er haft eftir Maartje Oldenburg, dóttur hans, að hann hafi verið heilsuveill síðan hann datt fyrir um mánuði og mjaðmarbrotnaði.
Oldenburg fæddist í Stokkhólmi 1929, en eyddi stórum hluta bernsku sinnar í Chicago þar sem faðir hans starfaði hjá sænska sendiráðinu. Oldenburg nam við Yale og Art Institute of Chicago. Um miðja síðustu öld settist hann síðan að í New York og fékk bandarískan ríkisborgararétt.
Oldenburg vann í um þrjá áratugi með Coosje van Bruggen, seinni konu sinni, þar til hún lést í upphafi árs 2009. Á þeim árum sköpuðu þau hjónin yfir fjörutíu opinbera skúlptúra fyrir garða og listasöfn. Yfirleitt sýna þessi verk hversdagslega hluti, sem öðlast aðra merkingu þegar þeir eru stækkaðir gríðarlega.