Atli Steinn Guðmundsson
atlisteinn@mbl.is
Ekki er talið útilokað að kornútflutningur Úkraínumanna hefjist nú á nýjan leik, þrátt fyrir innrásarstríð Rússa, eftir að Tyrkir náðu samkomulagi við Úkraínu í gær um að vera þeim til fulltingis um að flytja korn yfir Svartahafið og þaðan í gegnum tyrknesku höfuðborgina Istanbúl.
Sátu við langt borð
Hafa Sameinuðu þjóðirnar miðlað málum á þessum vettvangi, enda hefur stefnt í þurrð á mörkuðum víða um heim eftir að ein helsta útflutningsgrein Úkraínu lagðist nánast af í kjölfar árásar Rússa á landið.„Þetta er geisli vonar, möguleika og léttis,“ sagði António Guterres, aðalritari Sameinuðu þjóðanna, við undirritun samkomulags Tyrkja og Úkraínumanna í gær. Þar vísaði hann til þess hve verð matvæla hefur hækkað um allan heim síðan Rússar réðust á nágranna sína í febrúar og lömuðu landbúnað þeirra og helstu útflutningsleiðir.
Hvort tveggja rússneskir og úkraínskir embættismenn rituðu undir sáttmálann í gær, þótt langt borð skildi þar bakka og egg. Í miðjunni sat tyrkneski forsetinn Recep Tayyip Erdogan og þakkaði Guterres aðalritari honum fyrir að hýsa viðræður sem vonandi mörkuðu vatnaskil í stríði nágrannaríkjanna.