Robert Habeck efnahagsmálaráðherra Þýskalands telur enga ástæðu til að hverfa frá fyrirhugaðri lokun síðustu þriggja kjarnorkuvera landsins. Stjórnvöld í Þýskalandi hafa um árabil unnið að því að draga úr notkun kjarnorku í landinu en í kjölfar slyssins í Fúkúsíma árið 2011 ákvað ríkisstjórn Angelu Merkel að loka átta kjarnorkuverum án tafar og að öll kjarnorkuver landsins myndu hætta starfsemi eigi síðar en í árslok 2022.
Á fundi með almenningi sem haldinn var á sunnudag var Habeck spurður hvort ekki mæti fresta lokun síðustu orkuveranna í ljósi yfirvofandi orkukreppu í Þýskalandi, en landið sér fram á skort á jarðgasi og verðhækkanir á orkumarkaði vegna raskana á innflutningi jarðefnaeldsneytis frá Rússlandi.
Á fundinum sagði Habeck að lítill ávinningur væri af að halda kjarnorkuverunum þremur opnum og það myndi aðeins spara sem nemur 2% af jarðgasnotkun Þýskalands. Að sögn Reuters telur Habeck þó koma til greina að fresta lokun Isarkjarnorkuversins í Bæjaralandi ef álagsprófun leiðir í ljós að raforkuframleiðsla þess sé nauðsynleg fyrir stöðugleika raforkukerfisins á svæðinu og fyrir orkuframboð yfir vetrarmánuðina. Standa mælingar yfir og ættu útreikningar að liggja fyrir á komandi vikum. ai@mbl.is