Viðtal
Helgi Snær Sigurðsson
helgisnaer@mbl.is
Kvikmyndin Abbababb! verður frumsýnd boðsgestum í kvöld og hefjast almennar sýningar á morgun, 16. september. Abbababb! er dans- og söngvamynd fyrir alla fjölskylduna, byggð að hluta á samnefndum söngleik sem aftur var byggður á hljómplötu dr. Gunna og vina með sama nafni. Nanna Kristín Magnúsdóttir er handritshöfundur og leikstjóri myndarinnar. Hún er menntuð leikkona og stundaði nám í handritaskrifum í háskóla í Vancouver í Kanada. Hlaut hún mikið og verðskuldað lof fyrir sjónvarpsþætti sína, Pabbahelgar , sem sýndir voru á RÚV árið 2019. Hún skrifaði handrit þáttanna ástamt Sólveigu Jónsdóttur og Huldari Breiðfjörð, framleiddi þá með Birgittu Björnsdóttur, leikstýrði þeim með Marteini Þórssyni og fór jafnframt með annað af tveimur aðalhlutverkum þeirra, hlutverk Karenar sem kemst að því að eiginmaður hennar, Marteinn, heldur fram hjá henni.
Abbababb! er fyrsta kvikmynd Nönnu Kristínar í fullri lengd en hún hefur skrifað nokkur handrit og leikstýrt bæði sjónvarpsþáttum og stuttmyndum.
Nanna Kristín ræðst ekki á garðinn þar sem hann er lægstur því Abbababb! er, sem fyrr segir, dans- og söngvamynd með fjölda barna í hópi leikara en fullorðnir leikarar koma einnig við sögu. Ein af mörgum áskorunum leikstjórans var að taka upp kvikmynd á tímum heimsfaraldurs með sínum breytilegu fjöldatakmörkunum og samkomubönnum.
Margra ára ferli
Nanna Kristín segir námið í Kanada á sínum tíma bæði hafa verið skemmtilegt og lærdómsríkt. „Það var farið inn á handritagerð fyrir kvikmyndir, sjónvarp, raunveruleikaþætti, teiknimyndir, stuttmyndir og tölvuleiki. Það er svo margt í boði fyrir handritshöfunda,“ segir Nanna Kristín. Hún hafi einbeitt sér að sjónvarpsefni og kvikmyndum. „Ég er ekki mikið í tölvuleikjunum,“ segir Nanna Kristín kímin.Blaðamaður sá ekki söngleikinn Abbababb! á sínum tíma og veit lítið sem ekkert um hann. Plötu Dr. Gunna og vina kannast hann hins vegar við. Nanna Kristín rifjar upp að söngleikurinn hafi verið frumsýndur árið 2007 í Hafnarfirði og góðu kallarnir í honum pönkarar en þeir vondu diskólið.
Hún er spurð að því hvort sagan í kvikmyndinni sé ekki önnur en í söngleiknum og segir hún svo vera. „Ég tek mið af honum en þegar maður er að skrifa handrit þarf maður auðvitað að setja sitt mark á það. Handritaskrif taka langan tíma, mörg ár. Ég reyndi að skrifa út frá mínu og því sem mig langaði að segja. Grunnurinn frá dr. Gunna er náttúrlega frábær og lögin líka en svo fer ég út í mína sögu. Það er mjög ólíkt að skrifa kvikmynd og leikrit. Í leikriti geturðu skipt um stað með einni ljósabreytingu en í kvikmyndum er það flóknara í framkvæmd. Velja þarf annan tökustað, ferja leikara og aðra starfsmenn á milli og auðvitað hanna leikmynd, nýtt sett o.s.frv,“ segir Nanna Kristín.
Abbababb gekk ekki á ensku
Kvikmyndin fer öll fram í sama skólanum og á einum degi. Nanna Kristín segir söguþráðinn í stuttu máli þann að þrír krakkar komist að því að óprúttinn náungi ætli sér að leggja skólann í rúst og eyðileggja þannig fyrir nemendum lokaballið sem halda á um kvöldið. Þau hafa tólf klukkustundir til að koma í veg fyrir þessi illu áform og segir Nanna Kristín kvikmyndina einmitt heita á ensku 12 Hours to Destruction , eða 12 klukkustundir til eyðileggingar . „ Abbababb! gekk ekki alveg sem enskur titill,“ segir hún kímin. Hún hafi farið í handritasmiðju Cinekid, fyrst í Amsterdam og einnig á Berlinale, kvikmyndahátíðinni í Berlín. Þar hafi titillinn ruglað fólk í ríminu og sumir talið hann tengjast hljómsveitinni ABBA. „Þannig að ég bjó til nýjan titil fyrir erlendan markað,“ segir Nanna Kristín sposk en til gamans hafi hún látið tvo vini í myndinni heita Benna og Björn með vísan til karlanna í ABBA. Hugmyndir komi oft út frá annarra manna skilningi og það átti við í þessu tilfelli.Nanna Kristín segir grunninn að handritinu hafa verið grípandi lög Dr. Gunna en að hana hafi vantað nokkur til viðbótar til að ljúka við söguna. Hún hafi rætt við doktorinn og spurt hvort það væri í lagi og hann gefið grænt ljós og sagt að hún hefði algjörlega frjálsar hendur. „Það var mjög rausnarlegt af honum að gefa mér þetta frjálsræði. Ég fann að ég þurfti fleiri lög til að koma því á framfæri sem ég vildi segja,“ segir Nanna Kristín. Því var fjórum lögum bætt við. Þorvaldur Bjarni Þorvaldsson samdi lögin og útsetti en hún skrifaði textana við þau. „Þannig að ég nú er ég orðin textahöfundur líka,“ segir Nanna Kristín og hlær.
Í djúpu laugina
– Þessi kvikmynd hlýtur að hafa verið flókið verk á heildina litið og mikil áskorun fyrir þig?„Hún er það en það er svolítið minn stíll að stökkva í djúpu laugina. Ég vil alltaf ögra sjálfri mér og stundum fer ég aðeins fram úr mér en þá er ég með fólk í kringum mig sem bendir mér á að taka eitt skref til baka, sem er bara hollt og gott. En þegar ég tók þetta verkefni að mér, sagði ég við framleiðendur að ég vildi gera dans- og söngvamynd og að ég vildi fá leikara á barnsaldri og þá mörg börn. Við erum að búa til heilan skóla og þó það séu þrjú börn í aðalhlutverkum eru fleiri stór hlutverk. Síðan fyllum við skólann með börnum og þar vildi ég ekki að væru bara aukaleikarar til að fylla upp í rammann og gefa liti eða form eða hreyfingar, heldur fengju öll börnin eitthvað til að vinna með og sína karaktera. Þar voru allar deildir sameinaðar í því að búa til persónur og hjálpa þeim með persónusköpun og þá ekki bara í útliti,“ útskýrir Nanna Kristín. Valgerður Rúnarsdóttir hafi, til að mynda, samið hreyfingar fyrir börnin auk þess að semja dansa.
Galdurinn felst í góðu fólki
„Þetta er mjög ævintýralegur heimur sem við búum til. Þetta gerist á níunda áratugnum en þó er þetta ekki svona sögulega og bókstaflega sá tími heldur búum við til ævintýra-„eitís“. Í dans- og söngvaatriðunum förum við tíu skrefum lengra og skrúfum allt í botn,“ segir Nanna Kristín um töfrandi heim kvikmyndarinnar. Líkt og blaðamaður er hún fædd árið 1974 og var því barn og unglingur á hinum ágæta níunda áratug og minnist hans með hlýju.Af stiklu myndarinnar sést að myndin er litrík og mikið lagt í búninga og leikmynd. „Það unnum við með kvikmyndatökumanni og leikmynd, búningum og förðun. Leikmyndahönnuðurinn heitir Sigríður Björnsdóttir og hefur unnið mikið á Ítalíu við stórar auglýsingaherferðir,“ segir Nanna Kristín frá. Hún hafi einmitt þurft slíka manneskju í lið með sér, manneskju með stórar hugmyndir sem gæti gert stórar hugmyndir leikstjórans að veruleika. „Það er auðvitað galdurinn við að vera leikstjóri, að vera með fólk í kringum sig sem er klárara en maður sjálfur. Stundum táraðist ég bara á tökustað yfir því hversu mögnuð vinna hafði átt sér stað út frá hugmynd sem var í kollinum á mér. Maður verður svo stoltur og þakklátur yfir því að þetta fólk hafi lagt allt sitt af mörkum til að gera sýn mína að veruleika sem þau fara svo ennþá lengra með og gera enn betri en ég hafði hugsað mér.“
Eyþór Ingi frábær
Nokkrir fullorðnir leikarar leika í myndinni og þar af einn sem þekktari er sem söngvari, látúnsbarkinn Eyþór Ingi Gunnlaugsson. „Það vita allir að hann er stórkostlegur söngvari. Hann leikur hr. Rokk og er bara frábær leikari og á leiksigur í myndinni. Hann fetar þar í fótspor Sigurjóns Kjartanssonar og Rúnars Júlíussonar sem léku hann í söngleiknum og ég held að Sigtryggur Baldvinsson hafi tekið við af Sigurjóni. Þannig að hann er í góðum hópi þar,“ segir Nanna Kristín. Af barnungum leikurum fara með helstu hlutverk þau Ísabella Jónatansdóttir, Óttar Kjerulf Þorvarðarson og Vilhjálmur Árni Sigurðsson.Kvikmyndin verður eflaust sýnd á nokkrum hátíðum erlendis en Nanna Kristín segir engar fréttir að færa af slíkum hátíðum að svo stöddu. Alla vega ekkert sem má nefna opinberlega. Eitt skref verði stigið í einu. Næsta skref er að taka á móti Íslendingum í bíó, segir hún. Víst er að frumsýningin verður fjölmenn á Íslandi þar sem sýnt verður í öllum sölum Smárabíós í kvöld.
Til baka
Leita í greinasafni
Prenta grein