Guðríður Guðmundsdóttir

Í dag verður mín yndislega Didda, tengdamamma og kær vinkona kvödd hinstu kveðju.

Fyrir tæplega 40 árum þegar ég kom með Garðari mínum inn á heimili fjölskyldu hans á Nýbýlaveginum var mér strax tekið opnum örmum af Diddu og Ragnvaldi. Heimili þeirra var oft gestkvænt og margar gleðistundir áttum við þar. Didda var mikil fjölskyldumanneskja og var ætíð boðin og búin að hjálpa til. Hún fylgdist vel með framgangi fjölskyldunnar og var annt um hag allra. Dætur okkar Garðars nutu góðs af umhyggju ömmu sinnar og voru þær hændar að henni og afa sínum enda voru þau einstaklega samhent í hlutverkum sínum.

Á árunum þegar við fjölskyldan bjuggum í Kaupmannahöfn voru Didda og Ragnvald dugleg að fljúga yfir til okkar með töskurnar fullar af fiski og fleiru íslensku góðgæti sem kom sér vel. Þá var nú hátíð í bæ og góðar minningar frá þessum tíma.

Didda var kraftmikil og virk kona, alltaf til í allt, ferðalög innan lands og utan og hvers kyns mannamót. Og gat brugðið á leik, eftirminnilegt er þegar hún brá sér í hlutverk undirleikara hjá bræðrum sínum þegar þeir sungu Kattadúettinn á ættarmóti stórfjölskyldunnar.

Ég er innilega þakklát Diddu fyrir samfylgdina, vináttuna og hjálpsemi hennar.

Elsku amma. Við systurnar eigum svo margar góðar minningar um góðar stundir með þér og afa. Ferðalögin skemmtilegu sem við fórum í með ykkur afa, þar sem ferðirnar til Þingvalla og á veitingahúsið Hafið bláa standa upp úr. Og öll jólin sem við héldum með þér og afa, það voru alltaf bestu jólin. Við bökuðum líka oft saman fyrir jólin og kökurnar voru alltaf gómsætar sem við fengum hjá ykkur á Nýbýlaveginum.

Þú varst alltaf til staðar og tilbúin að hjálpa okkur og fyrir það erum við mjög þakklátar. Takk fyrir allar stundirnar sem við áttum saman elsku amma Didda.

Elsku amma Didda.

Hrein í máli, hlý í svörum

hugljúf orð af þínum vörum.

góðvild þína í anda örum

alltaf mátti heyra og sjá,

gott var þér að gista hjá.

(Guðrún Jóhannesdóttir)

Takk fyrir allt.