Samkeppniseftirlitið (SKE) mun, að eigin frumkvæði og með viðbótargreiðslu frá matvælaráðuneytinu, ráðast í sérstaka athugun á stjórnar- og eignartengslum í sjávarútvegi. Tilkynnt var um úttektina á vef ráðuneytisins í upphafi mánaðarins og að gerður hefði verið samningur milli ráðuneytisins og SKE.
Í samningnum, sem ViðskiptaMoggi fékk afhentan frá ráðuneytinu, kemur þó fram að athugunin nær út fyrir eignarhald í sjávarútvegi. Til stendur að kanna eignarhald þeirra aðlila sem eiga hlut í sjávarúvegsfyrirtækjum í öðrum fyrirtækjum hér á landi, án tillits til þess á hvaða sviði þau starfa.
Ákvörðun um að ráðast í athugunina var tekin af SKE. Það kemur fram í svari ráðuneytisins við spurningum ViðskiptaMogga um málið.
Í byrjun þessa mánaðar tilkynnti ráðuneytið að ráðist yrði í kortlagningu stjórnunar- og eignatengsla í sjávarútvegi og að gerður hefði verið samningur við SKE um að tryggja „fjárhagslegt svigrúm“ til að stofnunin gæti ráðist í úttektina. Fyrir þessa vinnu greiðir ráðuneytið 35 milljónir króna til SKE, sem ber að skila niðurstöðunni í sérstakri skýrslu sem verði afhent ráðuneytinu í lok næsta árs.
Í samningi ráðuneytisins og SKE kemur fram að SKE og aðrar stofnanir taki sjálfstæða ákvörðun um það hvort og hvernig gögn sem aflað verður verði í framhaldinu nýtt til frekari rannsókna eða íhlutunar eftirlitsstofnunarinnar.
Í tilkynningu ráðuneytisins, þegar tilkynnt var um úttektina, kom fram að vinna við kortlagningu stjórnunar- og eignatengsla í sjávarútvegi væri liður í heildarstefnumótun ráðuneytisins og í „samræmi við stjórnarsáttmála og áherslur Svandísar Svavarsdóttur matvælaráðherra“. ViðskiptaMoggi spurði því hvort túlka mætti það sem svo að ráðherrann væri með áherslur í málaflokknum sem ekki væri að finna í stjórnarsáttmálanum. Í svari ráðuneytisins kemur fram að svo sé ekki.
Til baka
Leita í greinasafni
Prenta grein