Gátan er sem endranær eftir Guðmund Arnfinnsson:
Hryssan þetta heiti ber.
Hetja kvikmyndanna er.
Vínsopi það vera má.
Vel á lofti megum sjá.
Helgi R. Einarsson leysir gátuna þannig:
Frekar stygg er Stjarna mín.
Stjörnur myndir prýða.
Staupi í er stjarna vín.
Stjörnur um hvolfin líða.
Magnús Halldórsson á þessa lausn:
Heitið Stjarna hryssan bar,
í Hollívúdd finnst múvístar.
Rónum stjarnan alkunn er,
upp á himins brautum fer.
Sigmar Ingason svarar:
Við stallinn stendur Stjarna kembd og
þvegin
Stjörnum mörgum hvíta tjaldið hampar
Stjarna í glas með þökkum oft er þegin
Þung sigla ský þótt skíni himinlampar.
Guðrún B. á þessa lausn:
Hryssa heitir Stjarna,
hún er stjarna barna.
Stjarna: lögg í staupum.
Stjarna: jörð á hlaupum.
Sjálfur skýrir Guðmundur gátuna þannig:
Stjarna hryssu heiti er.
Humphrey Bogart stjarna sú.
Stjarna vín mun vera hér.
Varpar stjarna ljóma nú.
Þá er limra:
Það var angist og uppnám hjá konum,
og ekki nema að vonum,
þegar filmstjarna ein
kyssti afgamla Svein
og andlitið datt af honum.
Síðan er ný gáta eftir Guðmund:
Óðardís mér lagði lið
lausa stund að nýta,
gátu til að glíma við
getur hér að líta:
Nú finna skal á fljóti vað.
Finna á dúk svo megum það.
Hluti víst á hespu er.
Höfuðsynd, sem varast ber.
Sr. Helgi Sveinsson kvað svo;
Komdu og sýndu sæmd og rögg
sól er í miðjum hlíðum.
Dagsins glymja hamarshögg,
heimurinn er í smíðum.
Halldór Blöndal
halldorblondal@simnet.is