Ég er algjört heimadýr og elska að verja tíma heima hjá mér, kveikja á fullt af kertum, elda eitthvað gott og bjóða vinum eða fjölskyldu í mat. Ég er algjör súpukona og það er innprentað í mig að maður geti ekki borðað súpur á sumrin eða í sól svo ég elska þegar það fer að hausta og ég get hent í kraftmiklar súpur og haft þær í matinn heima.
Ég fyllist líka almennt meiri metnaði í eldhúsinu þegar skammdegið skellur á. Ég nenni einhvern veginn síður að elda og stússast í mat á sumrin. Besta tilfinning í heimi er að vera nýkomin úr sturtu, í hreinum náttfötum, með einhverja geggjaða súpu á hellunni, fullt af logandi kertum og smá haustlægð úti, segir Bára.
Hafa það notalegt í sófanum
„Íbúðin sem við búum í er frekar opin svo við sitjum flestöll kvöld saman í sófanum og förum yfir tölvupósta eða skilaboð sem við höfum fengið í gegnum fyrirtækin okkar. Við vinnum bæði sjálfstætt en hvort í sínu fyrirtækinu svo við hittumst bara á kvöldin og þá verjum við smá tíma saman í að stilla saman næsta dag eða dögum. Svo við sitjum flest öll kvöld eftir matinn einhvers staðar í sófanum, ég í tölvunni að vinna eða við að horfa á eitthvað saman. Við vorum reyndar líka að klára að smíða draumarúmgaflinn okkar í sumar og settum hann upp. Því er ég farin að eyða meiri og meiri tíma upp í rúmi á kvöldin að svara skilaboðum og tölvupóstum.Vinnunnar vegna eru Bára og unnusti hennar mikið á þeytingi en á haustin ná þau aðeins að slaka á heima fyrir. „Síðustu tvö ár höfum við eytt vorum og sumrum á ferðalagi á sendibíl fullum af vörum úr Brá verslun og sett upp pop-up-markaði um allt land. Við höfum svolítið tekið haustin í að slaka aðeins á og undirbúa okkur fyrir jólatörnina sem byrjar alltaf fyrr og fyrr,“ segir Bára en hún rekur einnig fyrirtækið Heimafínt með unnustanum Gabriel sem sérhæfir sig í sérsmíðuðum og klæddum húsgögnum. „Það er nóg að gera hjá okkur báðum þessa dagana – enda allir annaðhvort að gera fínt heima hjá sér eða að finna sér ný föt fyrir árshátíðirnar sem eru fram undan.“
Skemmtilegra að klæða sig á haustin
Það blundar enginn farfugl í Báru. Hún kann vel að meta að búa á Íslandi á haustin og veturna. „Ég bjó í Köben í eitt ár þegar ég var tvítug en það telst nú varla með þar sem veðrið þar er ekki ósvipað því hér heima. Ég hef enga löngun til þess að búa í landi þar sem er til dæmis alltaf sól eða alltaf svipað veður. Uppáhaldsárstíðin mín er haustið. Það eru svo fallegir litir í náttúrunni, skemmtilegra að klæða sig á morgnana og ég persónulega hef meiri metnað í eldhúsinu á þessum tíma sem mér þykir ekki leiðinlegt.Hvað ætlar þú að gera skemmtilegt í vetur?
„Borða nóg af súpum, brenna fullt af kertum og reyna að ná sem bestum tökum á því að baka gott brauð. Ég ætla að fara í leikhús og svo ætlum við að fjölskyldan að skella okkur til Köben í smá aðventuferð í desember sem ég er hrikalega spennt fyrir!“
tómatsúpa með ristuðum tómötum
Svolítil olía
1 laukur
4-5 hvítlauksgeirar
9 stórir tómatar
2 dósir Mutti-tómatar
1 tsk. þurrkað timían
1 bolli ferskt basil
2 kjúklingateningar
salt og pipar
1 tsk. sykur
rúmlega hálfur bolli rjómi
Hitið ofninn í 200 gráður.
Skerið níu tómata í tvennt eða þrennt (fer eftir stærð).
Skellið þeim á bökunarplötu og sullið smá olíu, salti og pipar yfir.
Bakið tómatana í klukkutíma eða þar til þeir eru orðnir vel eldaðir og gegnumsósaðir!
Setjið smá olíu, lauk, hvítlauk og timían í pott og brúnið aðeins.
Setjið svo tvær dósir af Mutti-tómötum í dós út í pottinn ásamt heilum bolla af fersku basil.
Kryddið með salti og pipar eftir smekk.
Látið malla í 5 til 10 mínútur á pönnunni.
Bætið tveimur bollum af vatni og báðum kjúklingateningunum út í og leyfið að malla í um 30 mínútur.
„Ég mæli með að skella töfrasprota ofan í til þess að blanda öllu saman í silkimjúka blöndu. Ég bæti svo í lokin smá rjómaslettu út í en það má alveg sleppa því. Það er svo algjörlega geggjað að gera grillsamlokur með osti til þess að dýfa í súpuna! Hún verður alltaf betri því lengur sem hún fær að malla,“ segir súpukonan Bára.