Hægt að hafa gaman þótt allt sé í steik

Helgi Snær Sigurðsson

helgisnaer@mbl.is

Ást, dauði og sálfræðingar koma við sögu á Ungfrú Íslandi , fyrstu breiðskífu rafpoppstríósins Kvikindis sem kom út fyrir fáeinum dögum. Kvikindi skipa Brynhildur Karlsdóttir sem vakti fyrst athygli þegar hún vann Músíktilraunir með pönksveitinni Hórmónum árið 2016; Friðrik Margrétar-Guðmundsson tónskáld sem hlaut verðlaun fyrir tónlist ársins á Grímunni í fyrra fyrir óperuna Ekkert er sorglegra en manneskjan og trommarinn taktfasti Valgeir Skorri Vernharðsson.

„Platan er samin af hálfgerðum útlögum í eyðimörk andlegra geðshræringa og kvartlífskrísu, eins og meðlimir sveitarinnar séu að rúnta í þúsundasta sinn og ákveði loks að snarhækka í græjunum, úr þeim ómi popp og garg um ást, dauða og sálfræðinga,“ segir í tilkynningu um plötuna en blaðamaður sló á þráðinn til Brynhildar til að forvitnast frekar um gripinn.

Skipulagt hjónaband

Hljómsveitin Kvikindi var stofnuð fyrir þremur árum og líkir Brynhildur því við skipulagt hjónaband. Sameiginlegur vinur þeirra Friðriks hafi stefnt þeim saman. „Okkur fannst það svo skemmtilegt því ég kem úr pönkheiminum, það er minn tónlistarbakgrunnur síðustu árin, og Friðrik úr klassíkinni,“ segir hún.

Vinurinn fyrrnefndi, Stefán Ingvar, átti líka hugmyndina að nafninu, Kvikindi. „Okkur fannst það einhvern veginn passa að við værum einhvers konar kvikindi,“ segir Brynhildur kímin.

Útkoma þessa stefnumóts er popptónlist með áberandi hljóðgervlum og taktföstum trommuleik. „Við erum svo ólík og berum mjög mikla virðingu fyrir hæfileikum hvert annars,“ segir Brynhildur um hljómsveitina.

Toppurinn á tilverunni

Platan heitir eftir einu laga plötunnar en þau eru tíu talsins. Brynhildur er spurð hvers vegna það hafi orðið fyrir valinu og segir hún lagið fjalla um að þótt allt sé í steik sé samt hægt að hafa gaman og vera ungfrú Ísland í eitt kvöld. „Eins og það sé toppurinn á tilverunni að vera ungfrú Ísland, eins og ég held að það geti verið,“ segir Brynhildur sposk.

Hún vísar í fyrrnefnda fréttatilkynningu en í henni segir að platan sé að einhverju leyti uppgjör við síðustu tíu ár lífs hennar, þegar hún hafi verið áhyggjulaus ungfrú Ísland áður en hún varð móðir. Þegar hún hafi haldið að lífið væri tilgangslaust og alltaf ástæða til að öskra eða gráta.

„Þetta eru allt textar eftir mig og um mínar upplifanir af heiminum og okkur fannst Ungfrú Ísland passa, að maður sé pínu ungfrú Ísland líka þegar maður er ungur að prófa sig áfram og verða ástfanginn, áður en maður eignast börn og fer að bera mikla ábyrgð,“ útskýrir Brynhildur og gantast með að næsta plata muni þá mögulega fjalla um húsmóður í úthverfi. Hún segir textana koma til hennar með misjöfnum hætti. Einn hafi hún til dæmis skrifað nýkomin af stefnumóti og hann nánast komið af sjálfu sér. Fæðingar laga og texta séu miserfiðar.

Til minningar um Betu

Yrkisefni Brynhildar eru af ýmsu tagi, sum í léttari kantinum en önnur háalvarleg. Það alvarlegasta er í „Betu“, lagi sem fjallar um vinkonu Brynhildar, Elísabetu Segler, sem svipti sig lífi árið 2019. Elísabet kærði ungan mann fyrir að hafa nauðgað henni árið 2011, þegar hún var nemandi við Menntaskólann í Hamrahlíð og var sá sýknaður fyrir Héraðsdómi Reykjavíkur nokkrum árum síðar. Þurfti Elísabet að rekast á ofbeldismanninn á göngum skólans og sitja með honum í tímum, eins og Brynhildur segir frá í pistli á Vísi sem birtur var 4. október síðastliðinn. Höfðu þá nauðgunarmál verið mikið til umfjöllunar í fjölmiðlum í tengslum við Menntaskólann í Hamrahlíð þar sem nemendur mótmæltu aðgerðaleysi skólastjórnenda í slíkum málum og Brynhildur tók virkan þátt í þeirri umræðu. Segir hún í pistli sínum að þegar hún var sautján ára og nemandi við skólann hafi henni verið nauðgað af vini sínum og skólabróður. „Þegar ég safnaði loksins kjarki til að segja skólayfirvöldum frá því mættu mér lokaðar dyr,“ skrifar hún en þess má geta að skólastjóri hefur núna beðið hana formlega afsökunar.

Brynhildur segist hafa rifjað þessi hræðilegu mál upp undanfarið í fjölmiðlum en segir lagið fjalla um sorgina sem fylgi því að missa ástvin. „Ég er kannski ekki mikið að fara út í smáatriði heldur frekar tilfinningar og þetta lag var samið stuttu eftir að hún dó. Þetta var besta vinkona mín,“ segir Brynhildur um Betu.

Hún er spurð að því hvort hún telji að mótmæli nemenda við MH muni skila þeim árangri sem vonast sé eftir og segist hún vona það innilega. „Ráðherra er að kalla alla skólastjórnendur á fund til að ræða viðbragðsáætlanir og annað en ef ég segi mína skoðun á þessu þá finnst mér ennþá mikil gerendameðvirkni, bæði innan skólans og í samfélaginu,“ segir Brynhildur. Slík meðvirkni sé á kostnað þolenda.

Hversdagsleg glíma

Sum lög plötunnar eru öllu léttari og „Ungfrú Ísland“ er eitt þeirra. Í því er hlustandinn hughreystur með þeim orðum að þótt hann eigi aldrei hreina sokka og sé alltaf á yfirdrætti í bankanum verði allt í lagi á endanum. Brynhildur er spurð hvort textarnir, á heildina litið, fjalli um eitt og annað sem fólk á hennar aldri og stað í lífinu sé að glíma við á degi hverjum. „Já, algerlega, þetta er mjög hversdagslegt en líka svolítið dramatískt en aðallega hugðarefni ástsjúkra ungmenna sem spanna allt frá því að bjarga heiminum yfir í að vera skotinn í einhverjum,“ svarar hún.

Eitt lagið heitir „Borgartún 31“. Hvað er þar til húsa? Brynhildur hlær og segist hafa haldið að þar væri sálfræðistofa. „Það gæti verið einhver stór misskilningur,“ segir hún hlæjandi og bendir á að lagið sé inngangur að öðru, „Okei“. „Tilfinningin á að vera eins og að labba inn á sálfræðistofu og okkur fannst skemmtilegt að það væri bara heimilisfang en það er svolítið fyndið ef þetta er vitlaust heimilisfang.“

Og talandi um sálfræðinga þá segir í tilkynningu að ást, dauði og sálfræðingar komi við sögu á plötunni. Kjarnar sú lýsing plötuna í heild? „Já, mér finnst það, mér finnst hún lýsa henni svolítið vel,“ segir Brynhildur að lokum.