Handboltinn
Gunnar Egill Daníelsson
gunnaregill@mbl.is
Ríkjandi Íslandsmeistarar Vals unnu afskaplega öruggan tíu marka sigur á nýliðum ÍR, 35:25, þegar liðin mættust í úrvalsdeild karla í handknattleik, Olísdeildinni, í Origo-höllinni að Hlíðarenda í gærkvöld. Þrátt fyrir lokatölurnar gaf fyrri hálfleikur það alls ekki til kynna að leiknum myndi ljúka með þetta auðveldum sigri Vals. Var hann enda í járnum og leiddi ÍR með einu marki, 14:13, í leikhléi. Í síðari hálfleik sýndu Valsmenn hins vegar styrk sinn og sigldu fram úr Breiðhyltingum.
Valur er þar með áfram á toppi deildarinnar með 12 stig að loknum sjö leikjum. ÍR er með 4 stig í 11. og næstneðsta sæti.
*Magnús Óli Magnússon átti stórleik fyrir Val þar sem hann skoraði níu mörk.
*Motoki Sakai kom ógnarsterkur inn af bekknum í mark Vals og varði 11 skot. Var hann með 52,4 prósent markvörslu.
*Arnar Freyr Guðmundsson fór þá fyrir ÍR og skoraði átta mörk.
*Ólafur Rafn Gíslason í marki ÍR varði 13 skot.
Selfoss vann sömuleiðis einstaklega öruggan tíu marka sigur, 34:24, þegar KA kom í heimsókn austur fyrir fjall.
Selfyssingar gáfu þegar í stað tóninn með því að komast í 6:1 eftir tæplega átta mínútna leik. Í leikhléi var staðan 21:12. Reyndist síðari hálfleikurinn því nokkurs konar formsatriði fyrir heimamenn, sem eru nú í 4. sæti.
*Markahæstir í liði Selfoss voru þeir Einar Sverrisson, Sigurður Snær Sigurjónsson, Ísak Gústafsson og Guðjón Baldur Ómarsson, allir með sex mörk.
*Vilius Rasimas fór á kostum í marki Selfyssinga og varði 18 skot, sem gerir 48,6 prósent markvörslu.
*Einar Rafn Eiðsson var markahæstur í liði KA með fimm mörk.
Fram og Grótta skildu jöfn, 29:29, er þau mættust í Framhúsi í Úlfarsárdal.
Leikurinn var kaflaskiptur en Grótta var þó með forystuna stærstan hluta leiksins. Þegar skammt var eftir komst Grótta í 29:25 og virtist eiga sigurinn vísan. Fram skoraði hins vegar fjögur mörk í röð og knúði fram jafntefli.
Fram er nú í 2. sæti deildarinnar, þremur stigum á eftir Val.
*Luka Vukicevic var markahæstur í liði Fram með átta mörk.
*Daníel Örn Griffin skoraði einnig átta mörk fyrir Gróttu og Lúðvík T. Bergmann Arnkelsson var skammt undan með sjö mörk.
*Einar Baldvin Baldvinsson varði 14 skot í marki Gróttu.