Norður
♠ 752
♥ 9
♦ D9765
♣ Á862
Vestur
♠ ÁD9
♥ --
♦ ÁG1082
♣ KG975
Austur
♠ G1084
♥ ÁG76432
♦ K3
♣ --
Suður
♠ K63
♥ KD1085
♦ 4
♣ D1043
Suður spilar 2♥ dobluð.
Sá sagnstíll að opna á styttri litnum með mislanga liti heitir „canapé“ á spilamáli, en það er franskt orð og merkir smáréttur eða snitta. Aðferðin á uppruna sinn í gömlu ítölsku lauf-kerfunum, sem dóu að mestu út þegar Precision kom til skjalanna 1969. Nema í Austurríki. Þar hefur Bláa lauf Garozzos lifað af allar hræringar tímans.
Alexander Wernle og Jovanka Smederevac eru austurrískir spilarar. Þau nota canapé og Wernle opnaði á 1♠ sem gjafari og hugðist svo sýna lengra hjarta í næsta hring. Það gekk ekki eftir. Suður kom inn á 2♥ og Smederevac doblaði neikvætt. Allir pass og fjórir niður.
Spilið kemur sjóðheitt frá bandarísku haustleikunum í Fönix í Arizona, sem nú standa yfir. Þau Wernle og Smederevac unnu þar viðamikla sveitakeppni (Mitchell Open), ásamt Bandaríkjamanninum John McAllister og hinum rammíslenska Sveini Rúnari Eiríkssyni.