„Við höfum áður fengið viðurkenningar fyrir okkar bjór en þessi verðlaun eru sérlega kærkomin og góð staðfesting á því að við bruggum góðan bjór. Það má segja að þetta sé jólagjöfin okkar í ár hér í brugghúsinu,“ segir Baldur Kárason, bruggmeistari hjá Víking brugghúsi, en fjórar bjórtegundir brugghússins hlutu nýverið verðlaun á hinni árlegu European Beer Challenge. Um er að ræða eins konar Evrópukeppni í bjórgerð þar sem bjórframleiðendur keppa í fjölda mismunandi flokka.
Víkingur gylltur og Thule unnu báðir til gullverðlauna í sínum flokki en auk þess nældi brugghúsið í silfurverðlaun fyrir bæði Víking Lite og Víking Rökkr.
„Þessi keppni skiptir mjög miklu máli og er mjög virt í bjórsamfélaginu enda er hún ekki bara staðfesting á bragðgæðum drykkja heldur einnig að þeir höfði til neytenda og séu söluvænir. Dómnefndin er skipuð stærstu innkaupastjórum bjórs í Evrópu, sem ákvarða hvað þessir helstu innflytjendur og heildsalar álfunnar kaupa,“ segir Baldur, sem hefur starfað við bjórframleiðslu í 29 ár og er því vel skólaður í fræðunum. hdm@mbl.is
Til baka
Leita í greinasafni
Prenta grein