Gátan er sem endranær eftir Guðmund Arnfinnsson: Til klæðagerðar hentar hann. Í húsi megum finna þann. Eins og selur synda kann. Á sál og geði hressir mann. Þessi er lausn Helga R. Einarssonar: Af bjórnum kemur bifurskinn

Gátan er sem endranær eftir Guðmund Arnfinnsson:

Til klæðagerðar hentar hann.

Í húsi megum finna þann.

Eins og selur synda kann.

Á sál og geði hressir mann.

Þessi er lausn Helga R. Einarssonar:

Af bjórnum kemur bifurskinn.

Bjór sem gaflhlað og ég finn.

Bjór sem selur synda kann,

sem og bjórinn hressir mann.

Sjálfur skýrir Guðmundur gátuna þannig:

Bjór í kápu brúka má.

Bjór í húsi krókur þá.

Í vatni bjór ég synda sá.

Sýp ég glaður bjórnum á.

Síðan er limra:

Í bjórinn hún blandaði skudda,

því blaut úr hófi var Gudda,

og koníakk

á knæpu drakk,

og giftist Grími í sudda.

Þá er ný gáta eftir Guðmund:

Kallar til mín krummi á skjá

„komdu þér nú lappir á“,

úr bólinu ég brölti því,

og blasir hér við gáta ný:

Mannfýla hin mesta er.

Meinvættur, sem varast ber.

Galdrabrögðum beitir sá.

Blótsyrði nú innt er frá.

Þessar limrur fylgdu lausn Helga:

Leyfilegt

Ástríka Sigga á Sandi,

sem er í hjónabandi

öðrum víst ann

þótt elski sinn mann,

hinn kallast heilagur andi.

Margt verður til í sundlaugarferðum. – Viskubrunnar

Oft verð ég alveg bit

er í pottinum sit

hjá afburðasnjöllum

almúgaköllum

sem á-öllu hafa vit.

Benedikt Valdemarsson frá Þröm í Eyjafirði kvað:

Syngur tíðin sorgarlag

sæld og blíðu dylur.

Á mér níðist nótt og dag

norðanhríðarbylur.

Kyrrð næturinnar varð Benedikt efni í þessa vísu:

Lokar ótta björtum brám,

blundi drótt er falin.

Læðist nóttin léttum tám

ljúft og rótt um dalinn.

Egill Jónasson á Húsvík orti:
Gengi manna mjög er valt,
mörg það sanna örin.
Þessi brann og þessi svalt,
þarna eru tannaförin.