Kenning Jesú og kirkjunnar!

Það þarf ekki að hlusta á öfgamenn, hvað þá kristna öfgamenn! Þórhallur Heimisson er fljótur að flokka mig sem öfgamann (öfgar = ýkjur, óhóf, innan skynsamlegra marka ísl. orðab.) og það aðallega vegna afstöðu minnar til samkynhneigðra þó ég hafi lagt mig í líma við að fjalla ekki um fólk heldur bara hneigðina sjálfa, lífsmátann. En hvers vegna er ég með þessa „öfgafullu“ afstöðu og leyfi mér að tjá hana á opinberum vettvangi?

Þegar Þórhallur teflir fram þeim rökum að samkynhneigðir njóti velvildar Guðs bara ef þeir „elska“ þá er það mjög forvitnileg afstaða sem vert er að skoða. Ég ætla að styðjast við Biblíuna því þaðan hef ég mjög langa sögu um viðhorf fortíðar til samkynhneigðarinnar. Borgirnar Sódóma og Gómorra eru notaðar sem fyrirmynd (fordæmi) um álit Guðs. Þessar borgir eru kynntar til sögunnar í fyrstu bók Biblíunnar. Þær snerta sögu Abrahams um 2100 f.kr. Lot, bróðir Abrahams fór þangað til að búa og var honum bjargað ásamt fjölskyldu hans en hvorki eiginkonan né tengdasynirnir björguðust. Engu barni var heldur bjargað úr borgunum áður en eldurinn féll af himni og eyddi þeim. Af hverju? Var ekki í lagi að allir „elskuðu“ alla?

Svo vandast málið. Þegar tíminn leið rifjuðu bæði Móse og spámenn Gamla Testamentisins upp söguna sem alvarlega viðvörun til samtíðarmanna sinna að fara ekki út í „óleyfilegar lystisemdir“(Júd. 7). Jesaja segir: „Ef Drottinn allsherjar hefði eigi látið oss eftir leifar, mundum vér brátt hafa orðið sem Sódóma, – líkst Gómorru“ (Jes.1:9). „Heyrið orð Drottins, dómarar í Sódómu. Hlusta þú á kenning Guðs vors Gómorru lýður!“ og í Jes. 3:9 ... þeir gjöra syndir sínar heyrinkunnar eins og Sódóma og leyna þeim ekki“, rétt eins og gert er hér á landi. Jesaja bendir Babyloníumönnum á hvað biði þeirra í Jes. 13:19: „Svo skal fara fyrir Babýlon þessari prýði konungsríkjanna og drembidjásni Kaldea, sem þá er guð umturnaði Sódómu og Gómorru.“ Nú gæti ég tekið þrjár tilvitnanir í spámanninn Jeremía og úr Harmaljóðunum, hjá Esekíel, Amos og Sefanía. Allir tala sama máli, til viðvörunar að „elska ekki“ að hætti Sódómu. Þó við flokkum samkynhneigðina í dag til mannréttinda.

Þá er Nýja testamentið eftir þar sem sagan af Jesú er og hann bendir á hvað bíður þeirra sem hafna boðberum Fagnaðarerindisins og vísa þeim á brott sbr. Matt. 10:15: „Bærilegra mun landi Sódómu og Gómorru á dómsdegi en þeirri borg.“ Vill presturinn vera valdur að svona meðferð á byggðum og bæjum Íslands með sinni villukenningu? Segir Biblían ekki að Guð er hinn sami í gær, í dag og um eilífð!

Svo má tína til orð Páls postula, Péturs og bróður Jesú sammæðra honum Júdasi er hann segir: “Eins og Sódóma og Gómorra og borgirnar umhverfis þær sem drýgt höfðu saurlifnað á líkan hátt og þeir og stunduðu óleyfilegar lystisemdir, þær liggja fyrir sem dæmi, líðandi hegningu eilífs elds.“ Vill presturinn ekki forða íslenskum bæjum að eiga þessa framtíð?

Að halda því fram að samkynhneigðin og saurlifnaður sé samþykkt af Guði bara ef fólk nýtur sameiginlegra ásta er alger firra hjá sr. Þórhalli Heimissyni. Hann hefur alla vega ekki Biblíuna með sér sem bendir á dóm Guðs yfir Sódómu 47 sinnum!

Samkynhneigðir sitja í skjóli ríkisstjórnar, Alþingis, dómstóla, bæjarfélaga, stéttarfélaga og (þjóð)kirkju. Allir þessir tala máli þeirra, meira að segja leggja fyrirtæki einar 100 milljónir í baráttusjóð Samtakanna 78 svo þeir geti barist sinni baráttu hindrunarlaust, tekið að sér kynfræðslu í grunnskólum og fá meðbyr hjá starfsfólki leikskólanna og bjarga mannslífum. Samt líður þeim illa og finnst þeir vera að tapa stöðu sinni. Varla er það vegna eins „öfgamanns“ sem tekur engum rökum nema Biblíunni?

Þeim, eins og mér, verður ekki bjargað nema með breyttu hugarfari. Jesús kom sem hin fullkomna fórn til að syndarinn láti af breytni sinni og gangi lífsgöngu sína með Orði Guðs og í samfélagi við Drottin Jesú Krists. Æðsta boðorðið er: „Þú skalt elska Drottin Guð af öllu hjarta!“ Skurðgoðin leiða menn frá Guði!