Áætlunarflug til og frá Vestmannaeyjum hefst að nýju næstkomandi föstudag, 16. desember, þegar Ernir fer þangað sína fyrstu ferð. Gerðir hafa verið samningar milli flugfélagsins og innviðaráðuneytisins um þrjár Eyjaferðir í viku, tvær á þriðjudögum og eina á föstudögum. Flug í kringum jól og áramót verður þó með aðeins öðrum hætti en þegar ferðir samkvæmt fastri áætlun byrja í upphafi nýs árs.
Stuðningur ríkisins við Eyjaflugið nú byggist á því viðhorfi að bæta þurfi samgöngur til og frá Vestmannaeyjum yfir vetrartímann, sem þó sé að óbreyttu mögulegt á markaðslegum forsendum. Samningurinn við Erni nú tryggir tímabundið lágmarksþjónustu á flugi, sem er mikilvægt fyrir íbúa og atvinnulíf í Vestmannaeyjum.
Flugfélagið Ernir sinnti Eyjaflugi frá 2010 fram í september 2020 en þá var ekki annað í stöðunni en að hætta flugi sökum minnkandi eftirspurnar. Fulltrúar Ernis segja að nú sé verið að hefja flug á þessari leið aftur sem vonandi verði til frambúðar og með fleiri ferðum en þremur í viku. sbs@mbl.is