Kristján H. Johannessen
khj@mbl.is
Fyrrverandi einkaritari fangabúðastjóra nasista hefur verið fundinn sekur um aðild að drápi yfir 10.500 manns. Sú sem um ræðir heitir Irmgard Furchner, 97 ára.
Árin 1943 til 1945 starfaði hún í fangabúðunum Stutthof í norðurhluta Póllands. Furchner hefur nú verið dæmd í tveggja ára skilorðsbundið fangelsi fyrir störf sín þar.
Búðirnar opnuðu í september 1939 og voru reknar óslitið til 9. maí 1945, eða allt þar til Rauði herinn frelsaði fangana þar. Talið er að 110.000 fangar hafi verið vistaðir í búðunum og voru allt að 65.000 þeirra myrtir. Var fólkið ýmist skotið, tekið af lífi í gasklefum eða örmagnaðist vegna þrælkunarvinnu og skelfilegs aðbúnaðar. Sjálf var Furchner táningur að aldri þegar hún vann í búðunum. Hún heyrði hins vegar beint undir fangabúðastjórann og SS-yfirmanninn Paul-Werner Hoppe, hvaðan allar skipanir bárust. Hoppe var árið 1955 dæmdur til níu ára fangelsisvistar fyrir stjórnunarstörf sín í fangabúðunum. Hann lést árið 1974, 64 ára gamall.
Lögmaður Furchner sagði fyrir dómi vafa leika á því hvað hún vissi í raun og veru. Sjálf sagði hún fátt fyrir dómi. Það helst að hún sæi eftir tíma sínum í fangabúðunum.