Á meðan Dagur B. Eggertsson borgarstjóri gefur fólk saman í sólinni í Suður-Afríku gætir starfandi borgarstjóri, Einar Þorsteinsson, að eigin sögn hagsmuna borgarbúa með því að leyna þá upplýsingum um samning Ljósleiðarans og Sýnar um kaup þess fyrrnefnda á eignum hins síðarnefnda. Þeir miklu viðskiptahagsmunir, sem enginn má vita hverjir eru, felast meðal annars í að skuldsetja þetta dótturfyrirtæki Orkuveitunnar, og þar með skattgreiðendur í Reykjavík, um marga milljarða króna.
Einar starfandi borgarstjóri kvartaði yfir því í borgarstjórn í gær að Sjálfstæðisflokkurinn væri að setja upp „leikrit“ þegar hann óskaði umræðu og upplýsinga, og að hann væri „að gera allt tortryggilegt og sjá spillingu í hverju horni, og hika ekki við það að nota stór og ljót orð og gera fólki upp annarlegan ásetning“.
En vandinn er sá að sjálfstæðismenn í borgarstjórn þurfa ekki mjög fjörugt ímyndunarafl til að fyllast tortryggni þegar engar upplýsingar er að hafa um fyrirtæki í eigu borgarinnar, sér í lagi þegar þetta fyrirtæki er á einhverri stórundarlegri og óútskýrðri leið í rekstri sínum, sem var þó nógu undarlegur fyrir.
Og því miður verða þessi viðbrögð hins nýja borgarfulltrúa enn til þess að menn hljóta að spyrja sig hvað honum gangi til að gerast í hverju málinu á fætur öðru hlaupastrákur ekki-starfandi borgarstjórans.
Til baka
Leita í greinasafni
Prenta grein