Farþegi sem fékk hjartaáfall var hnoðaður til lífs um borð í þotu Icelandair frá Íslandi til Seattle í Bandaríkjunum að kvöldi jóladags. Vélin var komin yfir Grænland þegar farþeginn veiktist, en sá var samkvæmt heimildum Morgunblaðsins bandarískur karlmaður um sjötugt. Flugvélin, sem fór í loftið um kl. 17, var yfir Baffinslandi, sem er í nyrstu byggðum Kanada, þegar þetta gerðist. Flugfreyja og tveir læknar sem voru farþegar um borð hjálpuðu manninum en svo var þotunni lent í bænum Iqaluit í Kanada. Þar var farþeganum veika komið undir læknishendur. Flugvélin hélt svo eftir þetta áfram til vesturstrandar Bandaríkjanna, en atvikið tafði ferðina um tvær klukkustundir.
Áætlun Icelandair er nú komin aftur á rétt spor eftir þá röskun sem varð í óveðurshvellinum í byrjun síðustu viku. Fjöldi ferða féll út vegna veðurs, auk þess sem farþegar komust ekki í flugstöðina á Keflavíkurflugvelli vegna ófærðar á Reykjanesbrautar og víðar. Þetta setti stórt strik í alla reikninga, þar sem margir voru á faraldsfæti fyrir jólin. Því greip Icelandair til þess ráðs að leigja þotu af gerðinni Boeing 777 sem tekur 312 farþega og Airbus sem tekur 436 manns. Vélar þessar voru notaðar í ferðir meðal annars til Kaupmannahafnar og Tenerife og tókst með því að koma öllum á áfangastað. sbs@mbl.is
Til baka
Leita í greinasafni
Prenta grein