Thomas Frank, knattspyrnustjóri enska liðsins Brentford, hefur skrifað undir nýjan samning við félagið sem gildir til ársins 2027. Þessi 49 ára gamli Dani tók við liðinu af Dean Smith í október 2018 og hefur náð eftirtektarverðum árangri. Hann stýrði liðinu upp í úrvalsdeildina árið 2021 en undir hans stjórn endaði það nokkuð óvænt í 13. sæti á síðasta tímabili. Frank skrifaði undir nýjan samning í janúar á þessu ári en félagið vildi framlengja enn frekar við hann vegna góðs gengis.
Enska knattspyrnufélagið Aston Villa hefur fengið leyfi frá borgarstjórn Birmingham-borgar til að stækka leikvanginn sinn, Villa Park. Villa Park tekur 42 þúsund manns í sæti í núverandi mynd en félagið hefur fengið leyfi til að stækka hann svo hann geti tekið 50 þúsund í sæti. Þá á að byggja nýja stúku, Trinity-stúkuna, og einnig verður lestarstöðin í nágrenninu, Witton-stöðin, tekin í gegn. Villa Park er hugsaður sem einn af völlunum sem leikið verður á fái Bretland og Írland að halda Evrópumótið árið 2028 eins og þau hafa sótt um.
Brynjar Ingi Bjarnason, landsliðsmaður í fótbolta, gæti gengið í raðir Gautaborgar í Svíþjóð frá norska liðinu Vålerenga. Sænski miðillinn Expressen greinir frá að sænska félagið hafi mikinn áhuga á varnarmanninum, sem er 23 ára. Brynjar hefur leikið með Vålerenga frá því á síðasta ári, eftir stutta dvöl hjá Lecce á Ítalíu. Hann hefur átt erfitt uppdráttar undanfarna mánuði hjá Vålerenga og gæti hann leikið í Svíþjóð á næsta tímabili. Gautaborg hafnaði í áttunda sæti sænsku úrvalsdeildarinnar á síðustu leiktíð.
Til baka
Leita í greinasafni
Prenta grein