Norður
♠ ÁK85
♥ D543
♦ 72
♣ Á109
Vestur
♠ 93
♥ K6
♦ ÁK105
♣ DG762
Austur
♠ 10764
♥ 2
♦ DG8643
♣ K8
Suður
♠ DG2
♥ ÁG10987
♦ 9
♣ 543
Suður spilar 4♥.
Tvær samskiptareglur eru ómissandi í vörn: viðhorfsreglan (kall eða frávísun í sama lit) og hliðarkall (vísun til hliðar). Venjulega gildir bara önnur reglan í einu – til dæmis viðhorf í fyrsta slag og hliðarvísun í öðrum slag – en á því eru nokkrar undantekningar. Ein er sú þegar opnað er á veikum tveimur eða þremur.
Lítum á dæmi frá jólamóti BR. Austur opnar á veikum 2♦, suður segir 2♥, vestur 3♦ og norður 4♥. Allir pass og tígulás út. Til að ná spilinu niður verður vestur að skipta yfir í lítið lauf, strax í öðrum slag. En er eitthvert vit í því? Varla – nema AV noti „þriggja-lita-kall“ eftir opnun á hindrun. Þá getur austur kallað til hliðar með háu eða lágu spili, en beðið um litinn áfram með millispili. Í þessu tilfelli pantar austur lauf með tígulþristinum.
Allt er þegar þrennt er.