Á miðvikudaginn laumaði Ingólfur Ómar að mér einni vísu enn um kuldann sem ríkt hefur undanfarna daga:
Oddhent.
Emja náföl ýlustrá
ísagjáa hrakin.
Falin snjá er foldarbrá
frera gráum þakin.
Einar Jochumsson orti:
Grimmdarfrost um borg og bý
blöskrar manna kyni
frýs nú allt nema orð Guðs í
Einari Jochumssyni.
Og á Boðnarmiði orti Ólafur Stefánsson:
Frýs nú allt sem frosið getur
frerinn smýgur undir skinn.
Ekki vil ég annan vetur
eins hér lifa fyrst um sinn.
Pétur Stefánsson yrkir tvær að þessu sinni:
Hárin falla af höfði mér,
húð á maga stækkar.
Ákefð minnkar, aflið þver,
ástarleikjum fækkar.
Fimin minnkar, fölnar kraftur,
fjörið dofnar, magnast hnig.
Skyldi ég verða ungur aftur
það óskaplega gleddi mig.
Helgi Björnsson skrifar: „Fór um daginn í apótekið á Hvammstanga til að kaupa lyf og þurfti að bíða eftir samþykki lyfjafræðinga á Sauðárkróki. Meðan á biðinni stöð varð þetta til“:
ÁSTANDIÐ er illt að sjá
og afleitt mig í kringum
heilsu mína ef ég á
undir Skagfirðingum
Guðbrandur Þorkell Gudbrandsson svaraði:
Húnvetninga heilög vé
helguð dyggðum sönnum
þola ekki að saurguð sé
af syndugum hestamönnum.
Davíð Hjálmar Haraldsson orti:
Í uppsveitum Önundarfjarðar
ég æfingar stundaði harðar.
Þar var svo bratt
að þegar ég datt
þá var rúm tomma til jarðar.
„Tveir gaukar“ eftir Pál Jónasson í Hlíð:
Við erum í búri víst báðir
og brauðgjöfum annarra háðir,
úr vírneti er þitt
en vananum mitt
og bíðum þar – brauðgjöfum háðir.
Ljóðabókin „Vísur“ eftir Þór Stefánsson kom út á síðasta ári. Þar er margt vel kveðið og nær allt undir ferskeyttum hætti. „Gleðigjafi“ heitir þetta ljóð:
Lausavísan létt og kát
lyftir okkar geði
þótt við liggjum þarna mát
á þungum sjúkrabeði.
Lausavísan léttir oss
lund í raun og sorgum.
Hún er eins og kærleikskoss
á kinn í sveit og borgum.
Það er huggun harmi gegn
ef heilsufarið er í krísu
og lífið virðist mér um megn
að mega njóta lausavísu.
Hólmfríður Bjartmarsdóttir kann sér hóf:
það er mikil þörf að spara
það er ekkert grín.
Af því bara ætla ég bara
ekki að kaupa vín.
„Arðræningjar (hringhend sléttubönd)“ eftir Guðmundur Arnfinnsson:
Hrafnar garga, verja vé,
víða farga sauði,
safnar argur fóli fé,
fitnar margur kauði.
Indriði á Fjalli orti „Ó, Jón -“
Jón veit ekkert í sinn haus,
hvað á hann nú að segja:
Hann er orðinn orðalaus
af að hugsa og þegja.Þorgeir Magnússon yrkir:
Þó að aukist þref og rag,
þó að slitni söðulgjörð,
þó að versni veðurlag
veltist áfram blessuð jörð.