Vakning í þörungarækt

Þótt hér séu góðar aðstæður til stórframleiðslu á þörungum, bæði í sjó og á landi, er framleiðslan lítil. Þó virðist vera vakning í atvinnugreininni. Þörungar eru unnir til matvælaframleiðslu og ýmiss konar iðnaðar. Það er þó ávinningurinn fyrir umhverfið sem menn staldra sérstaklega við, því þörungarækt fylgir ekkert kolefnisfótspor, ólíkt annarri matvælaframleiðslu því þörungarnir binda koltvísýring (CO2) úr andrúmsloftinu.

Sigurður Pétursson, stjórnarformaður Asco Harvester í Stykkishólmi og formaður nýstofnaðra Samtaka þörungafélaga, vekur athygli á því að þriðjungur af útblæstri gróðurhúsalofttegunda í heiminum komi frá matvælaframleiðslu, stærsti hlutinn vegna framleiðslu á kjöti. Þótt kolefnisfótspor Íslands sé lítið í stóra samhenginu sé stefnt að kolefnishlutleysi hér með ýmsum aðgerðum, þar sem orkuskipti beri hátt. „Ef við myndum snúa okkur meira að sjálfbærum lausnum í matvælaframleiðslu gæti það skilað okkur miklu meiri árangri í umhverfismálum en orkuskipti í samgöngum,“ segir Sigurður. Aukin ræktun smá- og stórþörunga gæti orðið mikilvægur liður í þessu, að mati Sigurðar.

Fáein fyrirtæki hafa hafið ræktun á smáþörungum í ræktunarkerfum hér á landi og afurðum úr þeim. Enn meiri möguleikar eru taldir felast í nýtingu á stórþörungum úr fjörðum landsins. Thorverk á Reykhólum hefur lengi unnið afurðir úr þangi og þara. Fleiri fyrirtæki hafa hafið framleiðslu.