Ragnar Þór Ingólfsson, formaður VR, hyggst bjóða sig fram til áframhaldandi formennsku í stéttarfélaginu í kjöri sem fer fram í mars.
Ragnar greindi frá þessu á Facebook-síðu sinni í gær.
„Þrátt fyrir neikvæða umræðu um verkalýðshreyfinguna stendur VR ákaflega vel. Starf stjórnar og skrifstofu VR hefur verið framúrskarandi gott og einkennst af mikilli samheldni og virðingu,“ skrifar Ragnar og bætir við að félagið muni halda áfram þeirri góðu vinnu sem unnin hafi verið til að koma betur til móts við breytingar á vinnumarkaði og misjafnar þarfir ólíkra hópa.