Margir mæta í örvunarsprautu

Á degi hverjum mæta jafnan nokkrir tugir fólks á starfsstöðvar Heilsugæslu höfuðborgarsvæðisins til þess að fá 4. og jafnvel 5. sprautu og örvunarskammt vegna kórónuveirunnar. Ragnheiður Ósk Erlendsdóttir framkvæmdastjóri hjúkrunar segir að nú sé raunar svo komið að hætt sé að telja númer hvað skammturinn er sem fólk þiggi. Fremur sé horft til aldurs og heilsu fólks og í hvaða færum það sé til að verjast veiru.

„Við hvetjum fólk sextugt og eldra og þau sem eru með undirliggjandi sjúkdóma til að koma í sprautu ef fjórir mánuðir eru liðnir frá þeirri síðustu,“ segir Ragnheiður Ósk. „Við hófum bólusetningar undir þessum formerkjum í núna í september og síðan þá hefur verið þéttur gangur í öllum málum. Fólk mætir þá ýmist á heilsugæslustöðvar úti í hverfunum eða þá hingað í höfuðstöðvar heilsugæslunnar í Álfabakka 14a í Reykjavík.“

Vitund fólks um hættuna sem fylgir kórónuveirunni er almennt sterk, segir heilbrigðisstafsfólk. Slíkt gildir ekki síst um þau sem hafa sjúkdóma sem veikja náttúrulegar varnir gegn veiru. Má þar nefna hjarta- og æðasjúkdóma og veikindi í öndunarfærum, svo sem langvinna lungnateppu. „Kórónuveiran er viðvarandi og virðist grassera víða. Slíkt merki ég meðal annars af umtali, því mörg tilvik koma aldrei hingað á heilsugæsluna heldur notar fólk heimapróf og fær greiningu þannig. Slíkt er mikilvægt, því einkenni kórórónuveiru og hefðbundinnar inflúensu sem víða mallar eru um margt svipuð svo erfitt er að greina á milli,“ segir Ragnheiður Ósk.