Norður
♠ G82
♥ Á73
♦ G106542
♣ 7
Vestur
♠ Á43
♥ G654
♦ 873
♣ 982
Austur
♠ D109
♥ 109
♦ ÁD
♣ ÁK10654
Suður
♠ K765
♥ KD82
♦ K9
♣ DG3
Suður spilar 3♦.
Tvímenningur bridshátíðar var jafn og spennandi fram á síðasta spil, en svo fór á endanum að Norðmennirnir Christian Bakke og Tor Eivind Grude tylltu sér á toppinn með 57,6% skor. Gunnlaugur Karlsson og Kjartan Ingvarsson stóðu sig best Íslendinga – náðu öðru sæti, sjónarmun á undan þýsku hjónunum Sabine Auken og Roy Welland. Þau Auken og Welland höfðu leitt mótið lengst af síðari keppnisdegi, eða allt þar til þau mættu Gunnlaugi og Kjartani í næstsíðustu umferð.
Hér opnaði Auken í austur á sterku grandi eftir pass tveggja fyrstu. Kjartan passaði í suður, Welland líka, en Gunnlaugur barðist hetjulega í útnáranum – sagði 2♣ í merkingunni tígull eða hálitir. Auken sagði 3♣ á sexlitinn og Kjartan þreifaði fyrir sér með 3♦. Allir pass, níu slagir og hvorki meira né minna en 146 stig af þeim 150 sem voru til skiptanna.