Norður
♠ --
♥ KG10953
♦ KD97
♣ 832
Vestur
♠ ÁK109
♥ Á762
♦ 8
♣ G654
Austur
♠ 764
♥ D84
♦ 105432
♣ K7
Suður
♠ DG8532
♥ --
♦ ÁG6
♣ ÁD109
Suður spilar 3G.
Í kvöld verður þráðurinn tekinn upp í Reykjavíkurmótinu eftir bridshátíðarhlé. Sverrir Þórisson á góðar minningar frá síðasta spilakvöldi. Hann sat í suður með Guðmund Baldursson sem makker gegn hagleikssmið að norðan í sæti vesturs.
Eftir á að hyggja hefði verið viturlegt að spila bút í hjarta, en við borðið fannst Sverri hann alveg eins geta „skrölt í þremur gröndum“. Vestur opnaði á laufi „og svo fórum við Guðmundur að melda hjarta og spaða til skiptis þar til ég hjó á hnútinn“. Útspilið var lauf upp á kóng og ás.
Sverrir tók tvo slagi á ♦ÁG og sendi svo ♣9 út af örkinni. Þegar hún átti slaginn kláraði Sverrir tígulinn og vestur fór niður á blankan hjartaás. Sverrir spilaði hjarta og fékk ♠10 til baka og þar með áttunda slaginn. Sá níundi kom strax í kjölfarið eftir ♣D og tíu.
„Glæsilegt,“ sagði norðlenski smiðurinn örlátur.