Super Bowl-uppskriftir Vignis

Ostafyllt jalepeno

12 stk. jalapeno

6 sneiðar beikon
200 g Philadelphia-rjómaostur
100 g 4 osta blandan frá MS
1 hvítlauksgeiri, pressaður
salt og pipar.

Aðferð:

1. Forhitið ofninn í 200°C.

2. Blandið saman rjómaostinum, 4 osta blöndu og hvítlauknum.

3. Kryddið með salti og pipar, magn eftir smekk.

4. Skerið jalepeno eftir endilöngu, notið skeið til þess að fjarlægja fræin.

5. Fyllið með ostablöndunni og vefjið hálfri beikonsneið utan um.

6. Raðið á pappírsklædda ofnplötu og bakið við 200°C þar til jalepenoið er orðið mjúkt og beikonið stökkt. Það tekur um það bil 25 mínútur.

7. Berið strax fram.

Ómótstæðileg baby back-grísarif!

„Ég byrjaði á því fyrir nokkrum árum að taka himnuna af grísarifjunum og hef ekki snúið til baka þó svo að rifin séu fín með himnunni. Með því að taka himnuna af þá fellur kjötið auðveldlega af beinunum eftir eldun og það gerir þetta einstaklega djúsí og gott.“

2 baby back-grísarif

2 l Fanta

Sérvalið SPG Hagkaupskrydd, magn eftir smekk

1 msk. ólífuolía

malaður chili, magn eftir smekk

paprikuduft, magn eftir smekk

1 stk. Baby rays BBQ-sósa eða Mississippi BBQ-sósa (510 g)

Aðferð:

1. Takið himnuna af rifjunum.

2. Setjið rifin í ílát og hellið Fanta yfir þannig að gosið hylji rifin vel, leyfið rifjunum að liggja í gosinu í kæli í sólarhring.

3. Takið rifin upp úr gosinu, setjið á ofnplötu og kryddið vel með sérvöldu SPG og eftir smekk með chili og paprikukryddi. Það má líka leika sér með kryddin hér og bæta við því sem ykkur dettur í hug. Ástæðan fyrir því að ég nota sérvalið SPG er salt, pipar og hvítlaukur en leyniefnið í kryddinu hentar einstaklega vel á rifin en það eru espresso-baunirnar.

4. Dreifið smá ólífuolíu á rifin og nuddið kryddinu og olíunni vel á báðar hliðar rifjanna.

5. Setjið álpappír yfir rifin og setjið í forhitaðan ofn (160°C).

6. Takið rifin úr ofninum og fjarlægið álpappírinn.

7. Setjið BBQ-sósu vel yfir rifin.

8. Hækkið hitann í ofninum í 220°C og eldið áfram í 10 mínútur.

9. Fyrir þá sem vilja að BBQ-sósan verði meira karamelliseruð þá er gott að setja á grillstillingu síðustu þrjár mínúturnar í ofninum en fylgist vel með, svo rifin brenni ekki.

10. Látið standa í um það bil 10 mínútur áður en þið berið fram.

Stökkir og bragðmiklir
kjúklingavængir

„Ég var lengi að finna aðferð til þess að útbúa stökka kjúklingavængi án þess að djúpsteikja þá og loksins fæddist þessi uppskrift, eftir að ég fór að prófa mig áfram með lyftiduft í þennan rétt og nú verður ekki aftur snúið. Einnig er frábært að kaupa vængi sem búið er að skera til helminga, það einfaldar eldamennskuna.“

2 kg kjúklingavængir, um það bil 2 pakkar

2 msk. lyftiduft

1 tsk. salt

1 tsk. pipar

½ malaður chili (má sleppa)

Góðar sósur með

Franks-buffalósósa

Baby rays BBQ-sósa

Aðferð:

1. Þerrið kjúklinginn með eldhúspappír og geymið í kæli í 2-3 klukkustundir til þess að þurrka vængina enn betur.

2. Blandið þurrefnum saman í skál, bætið síðan kjúklingavængjum út í og blandið öllu vel saman. Það er mikilvægt að vængirnir séu þurrir á þessum tímapunkti svo þeir fái létta húðun af þurrefnablöndunni.

3. Setjið vængina á grind. Það er í lagi að þeir snertist aðeins en það er mikilvægt að þeir liggi ekki á bökunarplötunni svo fita og annar vökvi komist frá vængjunum.

4. Eldið í ofni við 120°C í 30 mínútur. Þegar sá eldunartími er liðinn er hitinn hækkaður í 200°C og vængirnir eldaðir í 35-40 mínútur til viðbótar eða þar til þeir eru stökkir og léttbrúnleitir.

5. Veltið gjarnan vængjunum upp úr sósu og berið strax fram.

Tillögur að sósum með vængjunum:

„Eftir eldun er hægt að velja um margar tegundir af sósum, hvort sem það er heimatilbúin hnetusósa, tilbúin teriyaki eða tilbúin BBQ. Ég býð upp á þrjár tegundir, sæta BBQ, sterka BBQ og svo buffalósósu. Það er langbest að skipta vængjunum í þrjár skálar, hita þær sósur sem fara á vængina, hvort sem það er í potti eða í örbylgjuofni, og síðan er sósum hellt yfir og vængjum velt upp úr sósunum. Hver og einn getur þá fengið sér sína uppáhaldssósu eða smakkað allar tegundir, það er líka sterkur leikur.“

Köld gráðaostasósa

180 g sýrður rjómi 18%

250 ml majónes

125 g Saint Agur-gráðaostur

Aðferð:

1. Hrærið öllum hráefnum saman með gaffli og stappið osti saman við.

2. Hér er það smekksatriði hvort þið viljið stóra eða litla bita af ostinum.

3. Best er að geyma sósuna í kæli í 2-3 klukkustundir áður en hún er borin fram.

Kjúklinga Alfredo mozzarella-stangir sem bráðna í munni

200 g rjómaostur

300 g rifnar kjúklingabringur

200 g mozzarella

100 g rifinn parmesanostur

1 tsk. salt

1 tsk. pipar

2 pressaðir hvítlauksgeirar

1 pk brauðrasp

4 egg

200 g hveiti

2 brúsar djúpsteikingarolía

Sósa

100 g majónes

100 g sýrður rjómi

2 tsk. þurrkuð steinselja

2 tsk. þurrkað óreganó

1 tsk. þurrkuð basilíka

1 tsk. hvítlauksgeiri, pressaður

½ tsk. salt

½ tsk. pipar

1 tsk. sítrónusafi

1 tsk. Worchestershire-sósa

Aðferð:

1. Setjið rjómaost, kjúkling, mozzarella, parmesan, hvítlauk, salt og pipar í skál og blandið vel saman.

2. Hellið blöndunni í pappírsklætt ferkantað form. Dreifið vel úr og þjappið blöndunni ofan í formið, þannig að hún verði jafnþykk alls staðar og ekki meira en 3 cm á hæð. Hér er lykilatriði að hafa í huga að þykktin á blöndunni í forminu er þykktin á stöngunum.

3. Setjið formið í frysti í að minnsta kosti fimm klukkustundir.

4. Takið formið úr frystinum og skerið í um það bil 10-12 cm langa bita.

5. Hrærið saman egg í skál.

6. Setjið brauðrasp og salt saman í aðra skál.

7. Setjið hveiti í þriðju skálina.

8. Byrjið á því að húða bitana upp úr hveiti, veltið svo upp úr eggi og svo brauðraspi. Síðan aftur í eggin og í annað sinn í brauðraspið. Endurtakið þessi skref fyrir alla bitana.

9. Hitið olíuna og djúpsteikið þar til bitarnir eru gullinbrúnir.

Sósan:

1. Blandið öllum hráefnum saman í skál og hrærið.

2. Geymið sósuna í kæli í um það bil tvær klukkustundir áður en þið berið hana fram með stökku kjúklingaostabitunum.