Knattspyrnumaðurinn Júlíus Magnússon hefur gert fjögurra ára samning við norska félagið Fredrikstad. Hann kemur til félagsins frá Víkingi úr Reykjavík, þar sem hann hefur verið frá árinu 2019.
Fredrikstad hafnaði í tíunda sæti norsku B-deildarinnar á síðasta tímabili, með 35 stig eftir 30 leiki. Júlíus varð Íslands- og bikarmeistari með Víkingum árið 2021 og aftur bikarmeistari með liðinu á síðasta ári. Hann var einnig fyrirliði liðsins á síðasta ári.
Miðjumaðurinn fór ungur að árum til Heerenveen í Hollandi, en lék aldrei með aðalliði félagsins. Lá leiðin því í Fossvoginn, þar sem hann blómstraði í Víkingsliðinu. Júlíus hefur leikið 78 leiki í efstu deild hér á landi og skorað í þeim sjö mörk. Þá hefur hann leikið fimm A-landsleiki fyrir Ísland.