Náttúrufræðistofnun Íslands hefur hlotið 1,8 milljóna króna styrk úr Orkurannsóknasjóði Landsvirkjunar til að rannsaka útbreiðslu mosategundarinnar hæruburstar, Campylopus introflexus. Verkefninu er stýrt af Pawel Wasowicz grasafræðingi.
Fram kemur á vef Náttúrufræðistofnunar að hæruburst sé innflutt mosategund sem hafi borist til Evrópu árið 1942 frá suðurhveli jarðar en hún er útbreidd í suðurhluta Suður-Ameríku og Afríku og hluta Ástralíu, auk eyja í Kyrrahafi, Atlantshafi og Indlandshafi. Hér á landi var staðfest að hæruburst hefði fundist í Mývatnssveit árið 1983 og í kjölfarið fannst hún víðar.
Rannsóknir, sem gerðar hafa verið í Evrópu, sýna að hæruburst getur haft áhrif á líffræðilegan fjölbreytileika með því að mynda þéttar breiður sem kæfa staðbundinn gróður. Sýnt hefur verið fram á að hún veldur því að innlendum tegundum fækkar í þurru graslendi og furuskógum og hefur neikvæð áhrif á spírun innlendra plöntutegunda. Einnig hefur verið sýnt fram á að mosinn breytir tegundasamsetningu dýralífs á svæðum þar sem hann nær fótfestu.
Stofnunin segir, að ástæða sé til að gruna að hæruburst geti skaðað líffræðilegan fjölbreytileika á íslenskum jarðhitasvæðum og ógnað fágætum jarðhitavistgerðum. Engar birtar, ritrýndar vísindalegar rannsóknir séu þó til um hæruburst á Íslandi og aðeins hafi verið gerðar takmarkaðar athuganir á tegundinni. Fram til þessa hefur hæruburst eingöngu fundist á nokkrum stöðum á Reykjanesskaga, á Hengilssvæðinu, í Landmannalaugum og í Þingeyjarsveit. Engar birtar rannsóknir eru til um áhrif tegundarinnar á lífríki jarðhitasvæða.
Til baka
Leita í greinasafni
Prenta grein