Jóhannes Þór Skúlason, framkvæmdastjóri Samtaka ferðaþjónustunnar, telur mögulegt að hátt í tvö þúsund ferðamenn verði án gistingar um helgina en verkföll hótelstarfsmanna Berjaya-hótela og Reykjavík Edition hófust á hádegi í gær.
„Bókunarstaðan er almennt góð á hótelum og bara á Berjayja eru þúsund herbergi svo dæmi sé nefnt,“ segir Jóhannes Þór, og tekur fram að ekki sé hægt að bjóða gestum sem séu nýkomnir á hótelin að þrífa eftir þá sem dvöldu á undan þeim í herbergjunum.
„Ef við horfum bara á helgina má áætla að þetta séu 1.000 til 2.000 manns sem verði í vandræðum ef miðað er við bókunarstöðu,“ segir hann og bætir við að talan gæti hækkað upp í 4.000 eftir helgi.
Eldsneytisbirgðir klárast
Verkföll olíubílstjóra í Eflingu sem vinna hjá Samskipum, Skeljungi og Olíudreifingu hófust einnig á hádegi í gær. Eldsneytisbirgðir voru á þrotum á þónokkrum bensínstöðvum og virtist díselolía vera að klárast á undan bensíni.
Ástráður Haraldsson, settur ríkissáttasemjari í kjaradeilu Eflingar og SA, boðaði fund klukkan níu í gærmorgun í Karphúsinu. Fundir stóðu yfir mest allan daginn en þegar blaðið fór í prent var enn setið við fundarborðið.
„Við erum að horfa upp á samfélagið verða fyrir tjóni á hverjum einasta degi núna. Það er að aukast með því verkfalli sem hófst í dag. Það viljum við öll sem samfélag stöðva, sem allra fyrst. Það er enginn sem græðir á þeim til lengri tíma litið,“ sagði Eyjólfur Árni Rafnsson, formaður SA, í gær.
Línurnar ekki skýrar
Sólveig Anna Jónsdóttir, formaður Eflingar, var vongóð og sagðist hafa trú á því að verkfallsaðgerðirnar myndu skila betri niðurstöðum, en verkföll séu til að knýja á um betri samninga.
Undanþágunefnd Eflingar fundaði einnig í Karphúsinu í gær en Sólveig Anna fer fyrir nefndinni. Að því er fram kom í tilkynningu Eflingar voru allar beiðnir um verkfallsundanþágur vegna almannaöryggis veittar. Hinrik Örn Bjarnason, framkvæmdastjóri N1, segir eftir eigi að skýra línurnar um hvernig eigi að þjónusta þá sem hafa fengið undanþágu. Aðspurð kvaðst Sólveig Anna ekki vita um neina hnökra sem komið hefðu upp. Þá vildi hún ekki gefa upp hvort undanþágur yrðu veittar fyrir matvöruverslanir.