„Ég bið alla hlutaðeigendur, en þó fyrst og fremst Hüster, afsökunar á óviðunandi framferði mínu,“ segir Marco Goecke, stjórnandi ballettflokks ríkisóperunnar í Hannover, í skriflegri yfirlýsingu sem hann sendi frá sér daginn eftir að honum var tímabundið vikið frá störfum eftir að hann gerðist sekur um að maka hundaskít framan í gagnrýnandann Wiebke Hüster í hléi á frumsýningu hjá óperunni um helgina. Í yfirlýsingunni segist Goecke hafa brugðist of harkalega við neikvæðum dómi sem Hüster skrifaði um nýjustu sýningu hans og gagnrýndi hana í leiðinni fyrir að skrifa „oft illkvitnislega dóma“.
Í samtali við DW gefur Hüster, sem skrifar fyrir Frankfurter Allgemeine Zeitung, ekki mikið fyrir afsökunarbeiðnina og hafnar þeirri ásökun Goecke að hún hafi ofsótt hann með neikvæðum dómum sl. 20 ár. „Þetta er þvaður. Á síðustu 17 árum hef ég skrifað um níu sýningar Goecke og í tvö skipti verið einstaklega jákvæð í hans garð.“ Stjórn óperunnar krafðist þess að Goecke bæðist afsökunar og útskýrði framferði sitt áður en hún tekur ákvörðun um hver verði næstu skref.
Til baka
Leita í greinasafni
Prenta grein