Undanþágunefnd Eflingar samþykkti á mánudagskvöld beiðni frá Slysavarnafélaginu Landsbjörg um undanþágu til afgreiðslu eldsneytis á björgunartæki félagsins. Undanþágan nær til allra björgunarsveita. Þetta kemur fram í tilkynningu frá Landsbjörg.
Landsbjörg vinnur nú að því í samstarfi við olíufélögin að skipuleggja fyrirkomulag afgreiðslu eldsneytis á björgunartæki.
Í tilkynningunni segir að engu að síður geti sú staða komið upp að viðbragð björgunarsveita gæti orðið hægara og hugsanlega skert, sökum takmarkaðs aðgangs að eldsneyti, en félagið sé að vinna viðbragðsáætlun með sveitunum til að minnka líkur á svo verði eins og kostur er.
Þá segir í tilkynningunni að fram undan sé enn einn stormurinn og því sé rétt að hvetja landsmenn til að fara sér að engu óðslega, fresta ónauðsynlegum ferðum inn á hálendið eða utan alfaraleiða með hugsanlegt skert viðbragð sveitanna í huga.