Hetjan í fyrsta leiknum

Ólöf Sigríður Kristinsdóttir stimplaði sig rækilega inn í íslenska kvennalandsliðið í knattspyrnu þegar liðið mætti Skotlandi á alþjóðlega mótinu Pinatar Cup á Spáni í gær.

Ólöf Sigríður, sem er einungis 19 ára gömul og samningsbundin Þrótti úr Reykjavík, var að leika sinn fyrsta A-landsleik gegn Skotlandi en hún gerði sér lítið fyrir og skoraði bæði mörkin í 2:0-sigri Íslands.

Skoska liðið var mun sterkari aðilinn í fyrri hálfleik og fékk liðið nokkur dauðafæri til þess að komast yfir. Sandra Sigurðardóttir í marki Íslands stóð vaktina hins vegar vel og varði allt sem kom á markið og þá gekk leikmönnum Skotlands líka illa að hitta markrammann í mörgum frábærum færum.

Íslenska liðið byrjaði síðari hálfleikinn betur og Ólöf Sigríður kom Íslandi yfir strax á 50. mínútu með skoti af vítateigslínunni en Agla María Albertsdóttir átti þá fyrirgjöf frá hægri.

Ólöf Sigríður tók vel á móti boltanum, lagði hann fyrir sig, og átti þrumuskot sem fór af varnarmönnum Skota og þaðan í netið.

Hún bætti svo við öðru marki sínu og íslenska liðsins mínútu síðar og aftur var það Agla María sem vann boltann á vallarhelmingi Skota og sendi hann á Ólöfu Sigríði.

Framherjinn sendi boltann til baka á Alexöndru Jóhannsdóttur sem sendi strax aftur á Ólöfu Sigríði sem lagði boltann fyrir sig, utarlega í teignum, og skrúfaði hann svo upp í samskeytin fjær. Ekki voru fleiri mörk skoruð í leiknum og Ísland fagnaði sigri.

Leikurinn var vægast sagt leikur tveggja hálfleikja en íslenska liðið mætti í raun ekki til leiks fyrr en í síðari hálfleik.

Skotar hefðu hæglega getað verið fjórum til fimm mörkum yfir í hálfleik en hálfleiksræða Þorsteins Halldórssonar skilaði sínu því liðið var mun beittara og ákveðnara í síðari hálfleik.

Íslenska liðinu hefur ekki gengið neitt sérstaklega vel að skora mörk í síðustu leikjum sínum og það var því mjög ánægjulegt að sjá Ólöfu Sigríði koma inn í liðið, algjörlega óhrædda, og skora tvívegis.

Agla María og Ólöf Sigríður náðu vel saman á vellinum og Amanda Andradóttir, sem lék fremst á miðjunni, átti nokkra góða spretti.

Miðjuspilið var hins vegar til vandræða oft og tíðum og það var og verður áfram stærsti hausverkur landsliðsþjálfarans að reyna að finna lausn á því svo liðið geti bæði haldið boltanum betur innan sinna raða, sem og spilað sig út úr pressu mótherjanna.

Karólína Lea Vilhjálmsdóttir sneri einnig aftur í leiknum en hún lék síðast með landsliðinu í 1:1-jafnteflinu gegn Frakklandi í D-riðli lokakeppni Evrópumótsins í Rotherham hinn 18. júlí á síðasta ári.

Liðið þarf svo sannarlega á henni að halda í sóknarleiknum en næsti leikur Íslands á mótinu er gegn Wales hinn 18. febrúar og liðið mætir svo Filippseyjum hinn 21. febrúar.