Undanúrslitaleikirnir í bikarkeppni kvenna í handknattleik fara fram í Laugardalshöllinni í kvöld en með þeim hefst hin svokallaða bikarhelgi HSÍ sem stendur til laugardags.
Annað kvöld eru undanúrslitin hjá körlunum og úrslitaleikirnir fara síðan fram á laugardaginn, úrslitaleikur kvenna klukkan 13.30 og úrslitaleikur karla klukkan 16.
Í undanúrslitum kvenna í kvöld mætast Haukar og Valur í fyrri leiknum klukkan 18 en ÍBV mætir Selfossi í Suðurlandsslag í seinni leiknum klukkan 20.15.
Miklar líkur eru á því að tvö efstu lið úrvalsdeildarinnar, ÍBV og Valur, hafi betur í þessum viðureignum og mætist í úrslitaleiknum á laugardaginn. Liðin tvö eru jöfn með 32 stig í tveimur efstu sætunum á meðan keppinautar þeirra sitja í sjötta og sjöunda sætinu.
Eyjakonur hafa verið á sérstaklega mikilli siglingu og hafa frá 19. október unnið alla fjórtán leiki sína í deildinni.
Haukar eru með 12 stig og Selfyssingar eru í næstneðsta sæti deildarinnar með 8 stig og þurfa líklega að fara í aukakeppni í vor um sæti í deildinni.
Valur hefur unnið alla þrjá leiki sína við Hauka á Íslandsmótinu í vetur, 37:22, 34:26 og 27:26 og ÍBV hefur unnið báða sína leiki gegn Selfossi, 32:27 og 40:19.
Valur er ríkjandi bikarmeistari kvenna og hefur unnið bikarinn átta sinnum. ÍBV vann bikarinn síðast árið 2004, þá í þriðja sinn og Haukar unnu sinn fjórða og síðasta sigur í bikarkeppninni árið 2007. Selfoss hefur aldrei orðið bikarmeistari.
Til baka
Leita í greinasafni
Prenta grein