Ragnheiður Birgisdóttir
Síðastliðna helgi gerði ég mikil kostakaup og kom heim með glænýjan flatskjá. Eftir að hafa fengið senda mynd af nýja stofustássinu skrifaði vinkona mín mér um hæl: „Vá, þetta er stórt!” Og bætti síðan við að hún ætti ekki við stærðina á sjónvarpinu heldur væri þetta stór lífsviðburður. Það að kaupa sjónvarp þykir líklega ekki sérlega markvert á flestum íslenskum heimilum, kannski aðeins skemmtilegra en að kaupa nýja ryksugu en ekki lífsviðburður af stærri gerðinni.
Það er það hins vegar í mínu lífi því ég ólst upp á sjónvarpslausu heimili. Þetta vita flestir sem þekkja mig enda þreytist ég ekki á að rekja þær raunir sem því fylgdu; að koma heim af leikskólanum og spyrja foreldrana hvað í ósköpunum þetta „starvos“ væri eða skammast sín niður í tær þegar allir í bekknum skildu orðið „spider“ í enskutíma nema ég sem hafði aldrei heyrt minnst á Spider-man, hann þekkti ég bara sem Kóngulóarmanninn úr teiknimyndasögunum í Morgunblaðinu. Kann ég þó foreldrum mínum miklar þakkir fyrir bóklestur æskunnar sem kom í staðinn fyrir sjónvarpsgláp og hefur svo sannarlega sett mark sitt á líf mitt. En núna ætla ég að gera tilraun með hinn ógurlega tímaþjóf á heimilinu og krossa bara fingur.