Ofnbakað úrbeinað lambalæri
1,5 kg úrbeinað lambalæri
½ dl olía
1 ½ msk. hunang
1 tsk. dijon-sinnep
3 tímíangreinar, laufin tínd af
3 ferskar rósmaríngreinar, nálar tíndar af og saxaðar
1 msk. oregano
1 tsk. hvítlauksduft
2 tsk. salt
1 ½ nýmalaður svartur pipar
1 hvítlaukur, skorinn þvert í tvo hluta
Hitið ofn í 180°C. Blandið olíu, hunangi, sinnepi og kryddi saman í skál og smyrjið á lærið. Notið hendur og makið vel á allt lærið, ekki er verra ef lærið fær að marinerast í ísskáp í nokkrar klukkustundir eða yfir nótt en þess þarf ekki.
Setjið lærið í ofn og bakið í um það bil klukkustund. Ausið soðinu yfir nokkrum sinnum á meðan eldun stendur yfir. Takið lærið út og látið jafna sig á borði í 15 mínútur og hafið álpappír yfir á meðan.
Bakað rótargrænmeti og laukur
6 gulrætur, skrældar
3 rauðlaukar, skornir til helminga
1 sellerírót, skræld og skorin í grófa bita
Setjið í eldfast mót ásamt 100 g af smjöri, saltið og piprið og eldið í ofninum samhliða lærinu. Má líka hafa grænmetið í sömu ofnskúffu og lærið.
Þegar lærið er tekið úr ofninum og hvílir á borðinu skal hækka hitann á grænmetinu í 200°C og elda í 15 mínútur til viðbótar eða meðan kjötið hvílir.
Berið fram með grænmetinu, bökuðum eða grilluðum kartöflum og góðri soðsósu.