Herrakvöldið er hápunktur ársins

„Kvöldið er opið fyrir herramenn á öllum aldri. Við gerum okkur vonir um að það verði í salnum eitthvað á þriðja hundruð manns,“ segir Daníel Þórarinsson, formaður herrakvöldsnefndar Lionsklúbbsins Njarðar.

Eitt glæsilegasta herrakvöld landsins er einmitt herrakvöld Lionsklúbbsins Njarðar sem hefur verið haldið árlega í rúm 60 ár. Það verður haldið um aðra helgi, föstudaginn 24. mars í Gullteigi á Grand Hóteli. Kvöldið verður mjög glæsilegt, gestir spariklæddir, frábær matur og dagskrá að sögn Daníels.

Guðrún Árný treður upp

„Þetta er hápunktur starfsins hjá klúbbnum,“ segir hann stoltur. Í Lionsklúbbnum Nirði eru rúmlega 50 félagar og segir Daníel að síðustu ár hafi yngri menn bæst í hóp félagsmanna. Herrakvöldið er þó opið öllum herrum eins og áður segir. „Undirtektir hafa verið afar góðar í ár enda verður þarna bæði glæsileiki og gaman, mikil ánægja og það er alltaf mikið hlegið.“

Á herrakvöldinu gera gestir vel við sig í mat og drykk auk þess sem boðið er upp á skemmtiatriði. Veislustjóri og uppboðshaldari á vinsælu listaverkauppboði verður hinn hnyttni Bragi Valdimar Skúlason, Ari Eldjárn skemmtir gestum með uppistandi og Guðrún Árný syngur og leikur á píanó.

Styrkja Grensásdeildina

Heiðursgestur í ár verður Gylfi Þór Þorsteinsson sem getið hefur sér gott orð sem stjórnandi farsóttarhúsa Rauða krossins á tímum kórónuveirunnar og var nú síðast í aðgerðastjórn vegna móttöku flóttamanna frá Úkraínu.

Daníel getur þess að nánari upplýsingar megi finna á Facebook með því að slá upp „Herrakvöld Lionsklúbbsins Njarðar“ eða hafa samband á lkl.njordur@gmail.com. Miðaverð er 19.900 krónur og segir Daníel að hringborðin í Gullteigi hafi hentað vel fyrir vinahópa sem vilja koma saman við þetta tilefni.

Listaverkauppboðið sem Bragi Valdimar stýrir varð fljótlega að föstum lið í starfi klúbbsins eftir stofnun hans og fer nú fram í 57. sinn að sögn Daníels. Afrakstur listaverkauppboðsins hefur reynst grundvöllur fjölþættra verkefna og nemur samtals um 220 milljónum króna það sem af er þessari öld, reiknað til núvirðis. Á þessum langa tíma hefur Njörður starfað náið með helsta myndlistarfólki landsins og í ár bætist einn fremsti listamaður Íslands, Sigurður Guðmundsson, í hópinn með skúlptúrverk. Hagnaði af listaverkauppboðinu verður varið til að styrkja Grensásdeild Landspítala á 50 ára afmæli deildarinnar nú í vor.

Ánægjulegt að geta hjálpað

Auk listaverkauppboðs er gestum boðið að taka þátt í happdrætti og hagnaður af því verður nýttur til að styrkja Alzheimer- og Parkinsonsamtökin. „Herrakvöldið er orðið þekkt í listamannaheiminum enda elsta uppboð listaverka á landinu. Við erum afskaplega stoltir af því. Okkur finnst við heppnir að geta gert eitthvað fyrir annað fólk. Við erum þess umkomnir og þá er sjálfsagt að gera það,“ segir Daníel.