„Bara það tjón sem fólk varð fyrir andlega, að upplifa þetta, manni finnst eins og það sé nóg. Það þarf ekki að bæta við fjárhagsáhyggjum,“ segir Guðmundur Höskuldsson, formaður Rótarýklúbbsins í Neskaupstað. Klúbburinn fór af stað með söfnun um helgina til að safna fé fyrir þær fjölskyldur sem misstu allt sitt í snjóflóðunum sem féllu á Norðfirði í síðustu viku. Mikið eignatjón varð í flóðunum en Guðmundur segir að altjón hafi orðið á að minnsta kosti 10 íbúðum. Þá er 21 ökutæki ónýtt, 20 bílar og einn vélsleði. Ríkislögreglustjóri ákvað í samráði við lögreglustjórann á Austurlandi í gær að aflýsa óvissustigi almannavarna í Neskaupstað og Veðurstofa Íslands aflétti einnig óvissustigi.
Söfnunin gengur vel en Guðmundur segir að margir hafi áhuga á að styrkja þær fjölskyldur sem verst fóru út úr flóðunum. Þeir sem vilja leggja sitt af mörkum til að aðstoða íbúa Neskaupstaðar geta lagt inn á eftirfarandi reikning:
1106-05-250199
Kennitala: 550579-1979.