Kolbrún Baldursdóttir, borgarfulltrúi Flokks fólksins, hefur þungar áhyggjur af fjárhagsstöðu borgarinnar og telur að of miklum fjármunum hafi verið varið í stafrænar lausnir án sýnilegs árangurs. Flokkur fólksins ætlar að bera fram tillögu í vikunni um að Stafrænt ráð, sem var stofnað í kjölfar síðustu borgarstjórnarkosninga, verði lagt niður.
Ráðinu var ætlað að „móta stefnu í gegnsæis-, lýðræðis-, stafrænum og þjónustumálum, ásamt innri og samfélagslegri nýsköpun.“ Þá á ráðið einnig að bera ábyrgð á eftirliti með rekstri þjónustu- og nýsköpunarsviðs. Kolbrún telur verkefni ráðsins hins vegar eiga heima í öðrum ráðum og nefndum.
Leikskólamál á pappír þrátt fyrir stafvæðingu
Borgarfulltrúinn er á því máli að fjárútlát til stafrænna lausna kristalli bresti meirihlutans sem felist í eyðslu um efni fram í gæluverkefni á meðan grunnþjónusta sé virt að vettugi. Í því samhengi nefnir hún að þrátt fyrir að hafa fjárfest ríkulega í stafrænni þróun séu úthlutun og umsóknir um leikskólapláss enn þá að nokkru leyti unnin á pappír.
„Það streymdu á þremur árum tíu milljarðar í þetta og svo bættust við aðrir þrír en maður sér svo engar almennilegar afurðir í hlutfalli við þessar upphæðir,“ segir Kolbrún sem vill sjá meira samstarf við ríkið á vettvangi upplýsingatæknimála.
Með því að verja svo miklu fé í að stafvæða ýmsa hluta rekstrarins á síðustu árum telur Kolbrún að borgarstjórn hafi farið á mis við tækifæri til þess að greiða niður skuldir og tryggja stoðir rekstrarins. Nú þurfi borgarbúar að súpa seyðið af því þegar hart er í ári og þá sé skorið niður í þjónustu.
„Mín tillaga í borgarráði var að borgin kalli eftir aðstoð og fái einhvern óháðan til þess að taka út reksturinn,“ segir Kolbrún sem er á því máli að Framsókn hafi brugðist með því að ganga inn í meirihlutasamstarfið.
Sérðu einhvern mun á þessum meirihluta með Framsókn?
„Nei, nema kannski pínu meiri kurteisi á fundum.“
Til baka
Leita í greinasafni
Prenta grein