Sveitarfélagið Árborg sagði í gær upp ráðningarsamningum við 57 starfsmenn sveitarfélagsins um leið og tilkynnt var um 5% launalækkun æðstu stjórnenda, bæjarstjóra og sviðsstjóra.
Þetta kom fram á vef sveitarfélagsins. Segir þar að þessar aðgerðir séu liður í hagræðingu í rekstri sveitarfélagsins sem gripið sé til vegna erfiðrar fjárhagsstöðu sem kynnt var íbúum í síðustu viku. Alls starfa í dag um 1.047 manns í 827 stöðugildum hjá Sveitarfélaginu Árborg og þær aðgerðir sem nú hefur verið gripið til snerta öll rekstrarsvið bæjarins og hafa áhrif á um 100 starfsmenn. Uppsagnarfrestur starfsmanna er samkvæmt samningum á bilinu þrír til sex mánuðir.
Á vef Árborgar segir, að nánari upplýsingar um áhrif uppsagnanna á starfsemi og þjónustu sveitarfélagsins verði kynntar síðar, en á þessum tímapunkti ætli stjórnendur sveitarfélagsins ekki að tjá sig frekar um málið.
Fram kom á íbúafundi í Árborg í síðustu viku, í máli Fjólu Steindóru Kristinsdóttur bæjarstjóra, að uppsagnir væru óhjákvæmilegar.
„Ég get ekki sagt hvort og hverjir það verða en í svona aðstæðum er það óhjákvæmilegt. Það verða einhverjar uppsagnir,“ svaraði Fjóla á íbúafundinum við spurningu fundarmanns um uppsagnir.