Verkum þýska listamannsins Rudolfs L. Reiters var um helgina skilað til síns heima í bænum Erding í Bæjaralandi.
Listgjörningurinn Eldur við heimskautsbaug hófst á Íslandi árið 2006 og má segja að viðburðurinn í Erding á sunnudag hafi verið lokahnykkur hans.
Sköpunarkraftur náttúrunnar var listamanninum hugleikinn og á Íslandi var þema hans eldurinn. Reiter kom til Íslands með þrjá fjögurra metra stranga, sem hann hafði málað á með olíulitum og sökkti þeim í gjá í Kröfluhrauni þar sem kraumaði undir þeim í nokkrar vikur. Einn þeirra varð Kröflu að bráð, en hinir náðust upp. Verkin voru sýnd fyrir og eftir bakstur í Listasafninu á Akureyri. Nú eru strangarnir komnir aftur heim.
Reiter lést 2019, 75 ára að aldri. Dóttir hans, Victoria Reiter, tók á móti þeim ásamt Hamit manni sínum og voru Arthúr Björgvin Bollason og Emil Þór Sigurðsson ljósmyndari, sem fylgdu Reiter á Íslandi, viðstaddir. Emil Þór vann með Reiter og urðu ljósmyndir hans listamanninum innblástur.