Fyrsti sigur Framara

Guðmundur Magnússon skoraði sitt fjórða mark í Bestu deild karla í knattspyrnu í sumar þegar liðið tók á móti ÍBV í Úlfarsárdal í 5. umferð deildarinnar í gær.

Leiknum lauk með sigri Framara, 3:1, en það var Sverrir Páll Hjaltested sem kom Eyjamönnum yfir á 30. mínútu með skalla.

Guðmundur jafnaði metin fyrir Framara fjórum mínútum síðar með marki úr vítaspyrnu eftir að brotið var á Má Elíassyni í vítateig ÍBV.

Eiður Aron Sigurbjörnsson, fyrirliði Eyjamanna, varð svo fyrir því óláni að skora sjálfsmark á 67. mínútu þegar aukaspyrna Fred Saraiva fór af honum og í netið áður en Þórir Guðjónsson bætti við þriðja marki Framara á 80. mínútu.

Halldór J.S. Þórðarson fékk svo að líta rauða spjaldið í liði Eyjamanna á 34. mínútu og þar með runnu allar vonir ÍBV um að jafna leikinn út í sandinn.

Akureyringar lengi í gang

Færeyski landsliðsmaðurinn Pætur Petersen skoraði sitt fyrsta mark fyrir KA þegar liðið lagði FH á KA-vellinum á Akureyri, 4:2.

KA-menn voru lengi í gang og það var ekki fyrr en á 45. mínútu sem Daníel Hafsteinsson braut ísinn fyrir KA með skalla af stuttu færi úr teignum eftir sendingu frá Hallgrími Mar Steingrímssyni. Pætur tvöfaldaði svo forystu Akureyringa með marki á 50. mínútu með föstu skoti úr teignum, aftur eftir sendingu Hallgríms Mars.

Hörður Ingi Gunnarsson minnkaði muninn fyrir FH með marki á 59. mínútu með frábæru utanfótarskoti, utan teigs, og boltinn söng í bláhorninu.

Sveinn Margeir Hauksson bætti við þriðja marki KA á 74. mínútu þegar hann fylgdi eftir föstu skoti Ásgeirs Sigurgeirssonar sem Sindra Kristni Ólafssyni tókst að verja í marki FH.

Úlfur Ágúst Björnsson minnkaði muninn enn á ný fyrir FH með marki úr vítaspyrnu á 84. mínútu eftir að boltinn hafði farið í hönd Ívars Arnar Árnasonar í vörn KA. Það var svo Elfar Árni Aðalsteinsson sem innsiglaði sigur Akureyringa með frábæru skoti úr teignum á 88. mínútu og Akureyringar fögnuðu um leið sínum fyrsta sigri í deildinni í sumar.

Leikjum KR – HK og Fylkis – Vals var ekki lokið þegar blaðið fór í prentun í gærkvöld. Fjallað er um þá á mbl.is/sport og M-gjöfin úr þeim verður í föstudagsblaðinu.