Átta félög sömdu

Átta stéttarfélög innan BHM hafa undirritað nýja kjarasamninga við samninganefnd Sambands íslenskra sveitarfélaga (SNS). Um skammtímasamninga er að ræða sem gilda frá 1. apríl sl. til 31. mars á næsta ári.

„Ég er ánægð með að samningar hafa náðst við sveitarfélögin. Þessi samningur er í anda þeirra sem önnur félög hafa nú þegar skrifað undir en þar að auki mættu sveitarfélögin kröfu okkar um jöfnun launa félagsfólks á afmörkuðu launabili,“ segir Brynhildur Heiðar- og Ómarsdóttir, formaður Fræðagarðs, sem er eitt þessara stéttarfélaga og hið fjölmennasta innan BHM.

Hafa staðið þétt saman

„Vissulega er þó hægt að líta á þennan samning sem frestunarsamning, en honum er ætlað að viðhalda kaupmætti félagsfólks Fræðagarðs í mikilli verðbólgu. Við framlengjum umræðu um stærri og víðtækari kjarabætur til næstu kjaralotu. Við stéttarfélög innan BHM höfum staðið þétt saman í viðræðum við sveitarfélögin sem og aðra viðsemjendur og þess háttar samstaða er ómetanleg í kjarabaráttunni,“ segir Brynhildur ennfremur.

Félögin sem sömdu við sveitarfélögin eru Félag íslenskra félagsvísindamanna, Félagsráðgjafafélag Íslands, Fræðagarður, Iðjuþjálfafélag Íslands, Sálfræðingafélag Íslands, Stéttarfélag bókasafns- og upplýsingafræðinga, Stéttarfélag lögfræðinga og Þroskaþjálfafélag Íslands. Kynning og atkvæðagreiðslur meðal félagsmanna eru þegar hafnar í félögunum. Rennur frestur til að greiða atkvæði út á hádegi næstkomandi föstudag.

82% í FIT og 100% í Byggiðn

Sveitarfélögin hafa nýlega gengið frá kjarasamningum við fleiri stéttarfélög. Í seinustu viku var samningur SNS við Félag iðn- og tæknigreina (FIT) samþykktur í stéttarfélaginu með um 82% atkvæða og samningur við Byggiðn var samþykktur með 100% greiddra atkvæða.