Af hverju var Ing­v­ar ekki drepinn?

Það er enginn sjónvarpsmyndaflokkur með sjónvarpsmyndaflokkum á Íslandi nema að Ingvar E. Sigurðsson sé drepinn. Þjóðina setti hljóða þegar Ásgeir týndi lífi í Ófærð enda um níðingsverk að ræða. Góður drengur og hvers manns hugljúfi, Ásgeir. Menn dauðsáu líka eftir Torfa skipstjóra í Verbúðinni enda mikið ólíkindatól þar á ferð sem hafði burði til að halda áhorfendum vel við efnið. Hann fauk strax í fyrsta þætti.

Enn birtist Ingvar okkur í Aftureldingu; nú sem hundleiðinlegur maður og klisjukenndur, Skarphéðinn handboltakappi. Afreksmaður í íþróttum sem orðinn var að lúinni og biturri fyllibyttu. Fyrsti þáttur var ekki hálfnaður þegar ég var farinn að hlakka til þess að hann yrði drepinn. En hvað var a'tarna? Alltaf tórði Skarphéðinn og varð bara leiðinlegri og leiðinlegri. Þvílík móðgun við minningu Ásgeirs og Torfa. Heilir átta þættir liðu án þess að kutinn færi á loft. Hverju sætir þetta eiginlega?

Höfundar Aftureldingar fá annað tækifæri, að mér skilst, en önnur þáttaröð er víst í smíðum. Varla ætla þeir að láta þessa aumu afsökun fyrir mann lifa hana af líka!