Bendir til ágreinings innan bankans

„Það virðast vera mjög skiptar skoðanir um þetta innan bankans. Ásgeir Jónsson hefur verið býsna skýr með að þetta skipti miklu máli, að koma lánamarkaðnum og sér í lagi íbúðalánamarkaðnum yfir og gera það að grunnákvörðun heimilanna að taka óverðtryggð lán [...]“

Þessum orðum fer Jón Bjarki Bentsson aðalhagfræðingur Íslandsbanka um þá stöðu sem komin er upp í kjölfar þess að Þórarinn G. Pétursson aðalhagfræðingur Seðlabankans kynnti svokallaða rammagrein í nýútgefnu riti, Peningamálum, þar sem starfsmenn bankans komast að þeirri niðurstöðu að það skipti litlu sem engu máli upp á miðlun peningastefnunnar hvort heimilin í landinu séu þungvigtuð í óverðtryggðum eða verðtryggðum lánum.

Til innanhússbrúks?

Jón Bjarki er gestur í nýjasta þætti Dagmála og er þar spurður frekar út í þessi ummæli sín og því varpað fram hvort nokkur ástæða sé til að ætla að þessi niðurstaða, eða rannsókn, hafi verið birt í óþökk seðlabankastjóra segir Jón Bjarki einfaldlega: „Ja, maður spyr sig. Ég veit svo sem ekki hvernig kaupin gerast á eyrinni þar en mér fannst þetta svolítið hafa verið til innanhússbrúks,“ og bætir því við að Þórarinn og ýmsir sem hafi lengi starfað á vettvangi bankans hafi afdráttarlaust talað fyrir verðtryggingunni.

Margir munu ráða vel við

Jón Bjarki bendir á að Seðlabankanum sé mikið í mun að berja verðbólguna niður áður en stórir hópar skuldara fái yfir sig endurskoðaða óverðtryggða vexti á íbúðamarkaði. Hann segir þrátt fyrir það að mjög stórir hópar lántakenda muni eiga tiltölulega auðvelt með að taka þær hækkanir á sig þar sem hækkandi verð íbúðarhúsnæðis og miklar launahækkanir vegi sterklega á móti mikilli hækkun afborgana. Íslandsbanki spáir því í nýrri þjóðhagsspá að laun muni hækka um 9% á þessu ári, 8% á komandi ári og að enn muni hækkanir nema 6% árið 2025.