Ríkisstjórn: Hættið að skatta fátækt fólk

Í boði ríkisstjórnarinnar er heilbrigðiskerfið okkar á yfirsnúningi, mannekla enn viðvarandi vandamál og álag á hverjum og einum starfsmanni allt of mikið. Í dag eru allt of mörg börn á biðlista eftir að komast á biðlista, til að komast á lokabiðlistann til að fá lífsnauðsynlega þjónustu í heilbrigðiskerfinu. Eitt barn á bið er einu barni of mikið því að börn eiga aldrei að bíða eftir lífsnauðsynlegri þjónustu.

Yfir 10.000 börn búa við fátækt á Íslandi árið 2023 og það er ríkisstjórninni til háborinnar skammar að láta fátækt barna viðgangast ár eftir ár. Að við sem búum hér í þessu auðuga og gjöfula landi skulum leyfa okkur að láta þúsundir barna lifa í fátækt og allt of stóran hóp þeirra í sárafátækt er okkur til háborinnar skammar. Verðbólgan sem nú er 10% étur upp allar hækkanir þeirra verst settu með hækkunum á leigu, matvælum, útvarpsgjaldi og ýmsum öðrum gjöldum úr öllum áttum sem rignir yfir fátækt fólk. Þetta eru gjöld sem ekki bara éta upp þann litla ávinning af 2,5% hækkun almannatrygginga sem boðuð er í aðgerðum ríkisstjórnarinnar núna, heldur valda þau því að þeir verst stöddu verða bara að herða sultarólina enn fastar.

Hvaða afleiðingar hefur það fyrir fólk að lifa í ævarandi fátækt? Könnun sýndi að fólk sem þarf að lifa við viðvarandi fátækt getur tapað árum og allt upp í áratug af ævi sinni. Það er okkur til háborinnar skammar að vera með þannig kerfi, sem ekki bara skaðar fátækt fólk andlega og líkamlega heldur styttir einnig verulega ævi þess.

Við í Flokki fólksins erum með frumvörp og tillögur til að koma í veg fyrir fátækt og þá einnig lausnir sem taka á vanda heimilanna. Ríkisstjórnin sér ekki vandamál þeirra verst settu, heyrir ekki í þeim sem verst hafa það og talar bara tungum sem enginn skilur, hvað þá hún sjálf. Því eru vandamál aldraðra að stóraukast og veikt og fatlað fólk býr í hennar boði við sárafátækt. Í skýrslu forsætisráðherra um fátækt og áætlaðan samfélagslegan kostnað, sem sérfræðingar unnu fyrir forsætisráðuneytið nýlega, kemur fram að svo virðist sem staða eldri borgara hafi í heildina lítið batnað og benda höfundar á að aldrað fólk á lífeyrislaunum almannatrygginga sem er fátækt búi nú við sárafátækt.

Að öllu þessu sögðu og vegna undrunar minnar á þeim vinnubrögðum ríkisstjórnarinnar að hækka lífeyrislaun almannatrygginga bara um aum 2,5% laust eftirfarandi vísu niður í huga mér:

Öryrkinn með íþyngjandi skattinn

er alveg staur.

Borgar ekki skerðingarskattinn

því hann á engan aur.

Svangur í sinni fátækt

á hann ekkert brauð

því hækkun þessarar ríkisstjórnar

er allt, allt of snauð.

Af þessu tilefni og mörgum öðrum: Ríkisstjórn, hættið að skatta og skerða lífeyri til sárafátæktar.