Eins og tíðarfarið hefur verið, þá er við hæfi að gefa Pétri Stefánssyni orðið með „Bæn höfuðborgarbúa“.
Enn skal byrja bænatuð
bara í tveimur liðum.
Heyrðu mig nú góði guð
góðverk tvö ég bið um.
Vil ég helst þú aukir yl
svo úlpunni megi sleppa.
Fjandi hvað mig fýsir til
að fara í sumarleppa.
Vertu nú guð minn góður kall
svo gefist sumarveisla.
Láttu skína á fjörð og fjall
fagra sólargeisla.
Á þessum vettvangi hefur áður verið fjallað um úrslit Vísnasamkeppni Safnahúss Skagfirðinga. Tíðar sólarlandaferðir Íslendinga og áhrif þeirra á verðbólgudrauginn voru þar yrkisefni og þvældist það ekki fyrir Guðmundi Einarssyni:
Ráðvilltir í raunum hósta
ráðamenn í sölum þinga.
Til að stöðva tíða pósta
tásumynda Íslendinga.
Elínborg Erla Ásgeirsdóttir velti því fyrir sér hvort Íslendingar ættu ekki bara skilið að fá birtu í sál og sinni að afloknum hremmingum heimsfaraldursins:
Mörgum hefur hugnast best
að hunsa Ásgeirs þanka.
Nú veirulúin veðja flest
á vexti í Gleðibanka.
Gaman var að heyra af vísnakeppni Rásar 2 fyrir um og yfir 30 árum, en þá var þrautin fólgin í því að semja vísu með innihaldinu „Gull í greipar“. Magnús Geir Guðmundsson bar sigur úr býtum:
Ægisfaðmur okkur sveipar,
ísakaldur, hélugrár.
Hans við sækjum gull í greipar,
giftu lands í þúsund ár.
Menntamálastofnun hefur efnt til samkeppni grunnskólanema og varð Magdalena Jónasdóttir hlutskörpust með þessum botni árið 2016:
Frostið bítur kalda kinn,
kominn úlputími.
Úti snjóar enn um sinn,
undir vegg ég hími.