Sjúkratryggingar Íslands og Læknafélag Reykjavíkur hafa gert samkomulag um þjónustu sérgreinalækna. Um langtímasamning er að ræða til næstu fimm ára. Hann er sagður tryggja fólki umtalsverða lækkun á greiðsluþátttöku fyrir veitta þjónustu sem á að verða betri og aðgengi að henni auðveldara. Fjármagn til þjónustu sérgreinalækna er aukið um 4,2 milljarða króna á ársgrundvelli.
Aukagjöld sem hafa verið lögð á sjúklinga undanfarin ár munu falla niður. Nýr samningur þýðir að greiðsluþátttaka fólks sem leitar til sérgreinalækna mun lækka um allt að þrjá milljarða á ári og greiða á fólki leið að nauðsynlegri heilbrigðisþjónustu óháð efnahag. Samningurinn er langþráður en sérgreinalæknar hafa verið samningslausir frá því í byrjun árs 2019.
„Þessi samningur markar tímamót,“ segir Willum Þór Þórsson heilbrigðisráðherra. „Að tryggja gott og jafnt aðgengi að þessari mikilvægu læknisþjónustu óháð efnahag er mikið gleðiefni og í samræmi við stefnu stjórnvalda. Þetta er samningur sem gerður er í góðri sátt. Horft er til framtíðar og samráð eflt milli allra aðila þannig að hægt sé að þróa heilbrigðisþjónustuna áfram í takt við þörf samfélagsins.“
Í nýja samningnum er að finna ýmis ákvæði til að hvetja til nýsköpunar og framþróunar til hagsbóta fyrir fólk.
Til baka
Leita í greinasafni
Prenta grein