Willum Þór Þórsson heilbrigðisráðherra og Ásmundur Einar Daðason, mennta- og barnamálaráðherra, hafa undirritað samning við Foreldrahús um auknar forvarnir.
Stuðningurinn er ætlaður til að auka aðgengi foreldra og barna að þjónustu, ráðgjöf og stuðningi Foreldrahúss í tengslum við fíknivanda barna með sérstaka áherslu á viðbragð við vaxandi notkun ópíóíða. Samhliða á í forvarnarskyni að auka fræðslu fyrir foreldra barna á unglingastigi grunnskóla um áhættuhegðun barna.
Fyrir hönd Foreldrahúss undirritaði Berglind Gunnarsdóttir samninginn. Í tilkynningu segir að hann sé liður í aðgerðum heilbrigðisráðherra til að sporna við skaða af völdum ópíóíða og annarra vímuefna og mennta- og barnamálaráðherra um snemmtækan stuðning í þágu farsældar barna.
Aðgerðirnar snúa m.a. að því að efla úrræði á vegum frjálsra félagasamtaka sem sýnt hafa fram á árangur á sviði forvarna og snemmtækra inngripa fyrir ungmenni sem sýna forstigseinkenni vímuefnavanda og aðstandendur þeirra.
Til baka
Leita í greinasafni
Prenta grein